Atualità
Cademia: Studënc á abelí la capela dl ospedal da Porsenú
I studënc dl Lizeum d’ert „Cademia“ y dla Scora profescionara por l'artejanat artistich de Ghërdena á restauré la Via Crucis tla capela dl ospedal da Porsenú.
Colié l’interes artistich a na aziun concreta por le bëgn dla comunité – chësc é sté le fin dla scomenciadia, tratan chëra che les studëntes y i studënc dl Lizeum d’ert „Cademia“ y dla Scora profescionara por l'artejanat artistich de Ghërdena á daidé da restauré i obiec artistics dla Via Crucis dla capela dl ospedal da Porsenú. L'ntendënta por les scores ladines Edith Ploner á sotligné tratan la presentaziun al publich dl resultat final tl ospedal a Posenú "l'importanza por les studëntes y i studënc da istalé n raport ince cun istituziuns aldinfora dl monn dla scora che dëida da colié le stüde tles classes cun l'aplicaziun pratica tl monn dl laur". La direturia dla scora, Elisabeth Baur á recordé che "al é gnü a se le dé n proiet dër garaté en colaboraziun cun le ospedal da Porsenú, sides deache i studënc á podü apliché tla pratica ci che al vëgn insigné tla teoria y insciö ince porté pro a na revalutaziun dla capela dl ospedal". La restauraziun é gnüda stlüta jö da püch cun la presentaziun al publich dl resultat final tl ospedal a Posenú en presënza dl'intendënta Ploner, dla direturia Baur, dl professur Diego Deiana y dla doturia Elisabeth Montel dl raiun sanitar de Porsenú.
Pro les operes artistiches se tratel de 14 relief de lëgn che rapresentëia les 14 staziuns dla Via Crucis che ti é gnüdes scincades al ospedal dal’artista de Gherdëna Mili Schmalzl (*1912 +2006). Les operes é ince gnüdes premiades tl ann 1960 tratan la “Deutsche Handwerksmesse” dal guern regional dl Paiern. Cun le passé dl tëmp s’á les operes danejé y insciö jol debojëgn de na restauraziun dles operes. Le laur artistich é gnü fat da indöt 9 scolares y scolars dla Cademia sot ala suravijiun dl professur Diego Deiana.
USP
Galaria dales fotografies
