Atualità
Revista de cultura NUJ: la cuarta ediziun é dan man
NUJ, la revista por la cultura jonila dl Südtirol, é dan man. Contribuc ince sön proiec y artisć ladins
Presenté i aspec desvalis dla cultura jonila y de plü artisć y proiec interessanc – chësc é l’obietif prinzipal dl foliet dla cultura jonila dl Südtirol NUJ. La cuarta ediziun de NUJ é gnüda presentada inier da sëra ai 2 d’otober tl zënter Creative Space RU.17 a Balsan. Tles söporjö 100 plates dl’ediziun 2018 vëgnel dé na panoramica sön l’ert, la leteratöra jonila, musiga de grups jogn y tematiches di media nüs.
Tla revista de cultrua NUJ vëgnel presenté te 20 contribuc desvalis de plü artisć y artistes, grups y proiec da döta la Provinzia y te de plü lingac provinziai sciöche por ejëmpl: Irene Hopfgartner, Al Plan Folk Festival, Veronika Kaserer, RU.17, IntroWerther, Anna Carol Bernard + Elisa Godino + Gaia Mattiuzzi + Greta Marcolongo, SetNet, Matthias Vesco + Gianluca Battistel, SMACH Val dl’Ert, Franziska Guggenbichler Beck + Andrea Bernard, FabLab Innsbruck, Marta Cuscunà, Robo Wunderkind, Die digitale Musikszene, Tobias Tavella, Lottozero, Heart of Noise Festival, Kulturelemente, binnen-I y Campomarzio.
“Nosta ghiranza é chëra da presenté te na manira autentica les idees di artisć jogn y mostré sö les arjuntes mo ince les sfidades che ai mëss afronté tratan sües esperiënzes”, dij Alexandra Pan, coordinadëssa dl proiet. Les idee presentades pó ince ester n impuls por d’atres scomenciadies y por mostré sö le percurs dla cultura jonila dl Südtirol.
Tratan la presentaziun él sté le DJ y informatich Patrick Dallio che á presenté so proiet “Robo”, che dess avijiné i mituns al monn dla programaziun. L’artist y partezipant dla Bienala d’Aunejia, Tobias Tavella, á baié de so laur cun materiai desvalis tl ciamp dla musiga y dl’ert. Alexander Demetz á spo presenté le conzet de coworking tl setur.
Le proiet dla revista NUJ é nasciü dan da trëi agn tla Repartiziun Cultura todëscia dla Provinzia por amplié la visibilité dla cultura jonila dl Südtirol. La cuarta ediziun de NUJ é dan man pro la sënta dl Ofize Cultura todëscia dla Provinzia tla strada Andreas Hofer 18 a Balsan o ince online sön la plata internet aposta.
USP
Galaria dales fotografies
