Atualità
Sorvisc por la jonëza: l’obietif é da cherié na rëi de colaboraziun
Al é gnü presenté le program dl Sorvisc por la jonëza por i grups linguistics ladin y todësch. L’obietif prinzipal é da mëte sö na rëi de colaboraziun
La Junta provinziala á aprové l’edema da denant le Program de sostëgn por la jonëza por i grups linguistics todësch y ladin. Le plann definësc les ativités, i criters de finanziamënt y les infrastrotöres nezesciares por le sorvisc por la jonëza. Inier, lönesc ai 16 d’aurí, él gnü presenté na soraodüda dles ativités da pert dl assessur provinzial Philipp Achammer, adöm al diretur dl Ofize Sorvisc por la jonëza, Klaus Nothdurfter, ala colaboradëssa dl Sorvisc por la jonëza por le grup ladin, Carla Pedevilla y ala referënta dl Comun de Parcines, Evelyn Tappeiner Weithaler. “Ti ultims agn él gnü fat tröp, sëgn sará le focus sön la cooperaziun danter les realtés interessades por mëte sö na rëi de colaboraziun”, á dit l’assessur Achammer. Les porsones scrites ite ales assoziaziuns joniles é söporjö 50.000 y tl setur él indöt 234 porsones che laora a tëmp plëgn. Implü él 5.860 porsones volontares. N punt fondamental por ti jí adicuntra ala jonëza ladina é la traduziun dl program por ladin, che sará tosc dan man.
“Al é important che al sides na buna colaboraziun danter i grups linguistics, sciöche ince danter chi che fej volontariat y chi che laora por Provinzia y Comuns”, á sotligné Achammer. Importanza ti é gnü dada ala rëi y comunicaziun cun dötes les organisaziuns, strotöres y comuns che se dá jö cun la jonëza.Tl program tl vëgnel dé n’atenziun particolara al valur dla inclujiun, dantadöt ai jogn svantajá, cun handicap o cun n background de migraziun. Un di punc prinzipai dl program é ince la “cooperaziun plurilinguala cun l’obietif da cherié na basa sön chëra che al pó gní fat na politica jonila deboriada.” Klaus Nothdurfter á sotligné che le plann é le resultat de n laur coletif cun la colaboraziun dl monn dles assoziaziuns y di Comuns.
USP
