Atualità
Tornê de hockey interladin 2018: Devënta dl Gherdëna
De plü seleziuns dles scores mesanes dles valades ladines s’á incunté por le tornê de hockey interladin a Sëlva. Le pröm post vá ala seleziun de ciasa.
La ediziun 2018 dl Tornê de hockey danter les scores mesanes dles valades ladines é jüda a piz dan da püch tl stadium dla dlacia „Pranives“ a Sëlva. Jogadësses y jogadus de Gherdëna, dla Val Badia, de Fodom/Alleghe, de Ampëz y de Fascia á combatü por le titul „Campiun de hockey interladin 2018“. Le prömes trëi posiziuns é jüdes a Gherdëna, Ampëz y Fodom/Alleghe. Spo s'á tlassifiché cuarta la seleziun de Val Badia y cuinta la Val de Fascia.
Vigni valada ê rapresentada al tornê cun öna na scuadra y á soghé cun dötes les scuadres dles atres valades. Le tornê da inann é gnü organisé dal Ofize Sorvisc sport de scora dl’Intendënza ladina.
Dal 2010 vëgnel organisé vigni agn n tornê de hockey danter les scores mesanes de Gherdëna, dla Val Badia, de Fodom/Alleghe, de Ampëz y de Fascia. I pröms trëi agn é le tornê gnü metü da jí a Alleghe, daldô tl 2013 te Gherdëna y tl 2014 te Fascia, tl 2015 tla Val Badia, tl 2016 a Cianacëi y l’ann passé a Alleghe. La proscima ediziun tl 2019 gnará organisada por le pröm iade a Ampëz.
USP
Galaria dales fotografies
