Atualità
Podëi, violënza y lingaz tl tëmp digital: incuntada ala Teßmann
La relaziun danter podëi, violënza y lingaz tl tëmp digital sará tl zënter de n’incuntada cun l’espert de lingac Peter Schlobinski ai 26 de merz tla Teßmann.
Le podëi se lascia sintí te düc i ciamps soziai. Al é n prinzip de ordin, zënza de chël che le monn foss tl caos. Le lingaz é n stromënt prinzipal tres chël che al vëgn a löm le podëi. Sciöche le podëi pó degeneré te maladoranza dl podëi y violënza, insciö pó le lingaz se trasformé te violënza verbala. Tó por le nes zacai, nen baié mal o le descriminé, le manacé, le descredité, ti fá mobbing, l’ofëne, le coiené, ti fá fá na burta figöra o le stlü fora cun parores – dötes chëstes é formes de violënza verbala. Implü se deslëriel fora debota y saurí tl tëmp digital.
Le linguist Peter Schlobinski ti ciara te so referat ai liams danter podëi, violënza y lingaz y mostra sö dlungia ejëmpli storics, dantadöt ejëmpli dal monn di media nüs. Schlobinski é professur de linguistica germanica tl seminar todësch dl'Université de Leibniz Hannover y ince presidënt dla Sozieté por le lingaz todësch. La manifestaziun gnará a se le dé en lönesc ai 26 de merz dl 2018 dales 20 tla Biblioteca provinziala Dr. Friedrich Teßmann, strada Armando-Diaz 8 a Balsan. La scomenciadia é organisada dala Sozieté por le lingaz todësch/seziun de Balsan, dl ofize linguistich dl istitut cultural dl Südtirol en colaboraziun cun la Biblioteca provinziala Dr. Friedrich Teßmann. L’entrada é debann.
USP
