Atualità
Ejam de maduranza tres le lernerat: iscriziuns cina ai 15 de merz
Dal ann de scora 2018/19 podará i lerneri che á bele stlüt jö cater agn de lernerat fá l’ejam de maduranza por merit de n curs che coliëia laur y stüde.
Tl dagní sarál poscibl por i lerneri y por les lerneres fá l'ejam de maduranza jon inant tl medemo tëmp cun le lernerat: de chësta forma inovativa de combinaziun de stüde y laur pó s'anuzé düc i lerneri che á bele stlüt jö cater agn de lernerat y che se scrí ite al curs de preparaziun de dui agn por fá l' ejam de maduranza. Les iscriziuns sará davertes cina ai 15 de merz dl 2018, al sará nezesciar da passé n ejame de amisciun.
La basa iuridica de chësta forma particolara de lernerat é gnüda inserida tl 2015 tla reforma statala dl marcé dl laur „Jobs Act“. Tratan l’ann scolastich 2018-19 gnarál insciö proponü por le secundo iade n curs spezifich tla Scora profescionala de lingaz todësch por l’artejanat y l’industria de Balsan por lerneri che ne ó nia arbandoné so post de laur por s’arjigné ca al’ejam de maduranza. Na pröma proa da ativé chësc curs á messü gní desdita l’ann passé por n numer massa bas de partezipanc.
I detais de chësc proiet é gnüs presentá incö ai 25 de jené dal assessur provinzial Philipp Achammer te na conferënza stampa. L’assessur á fat n apel da tó pert ai lerneri che á stlüt jö l’ejam de lernerat de n curs de cater agn o che á stlüt jö n curs de cater agn pro na scora profescionala o che le stlüj jö tl ann scolastich 2017/18.
Sciöche Cäcilia Baumgartner, direturia dl Ofize Lernerat dla Provinzia á splighé él gnü amplié inann le numer dles profesciuns ametüdes da 7 a indöt 19 (por la lista dles profesciuns prëibel tliché chiló). Cun chësc ampliamënt é ince la probabilité plü grana che le curs pois scomencé inann da d’altonn. Tó pert a chësc proiet ne porta nia ma vantaji al lerner, mo ince al’aziënda, olache al fej süa formaziun, á splighé le diretur dl LVH Thomas Pardeller. Le diretur dla scora profescionala interessada Peter Prieth á anunzié che al gnará a se le dé ai 7 de forá dl 2018 por düc i interessá na manifestaziun d’informaziun dales 19 inant tla scora profescionala dl artejanat y dla industria tla strada Roma 20 a Balsan.
Modalités y informaziuns por se scrí ite
En pratica él preodü curs de dui agn de preparaziun al ejam de maduranza por lerneri che á bele stlüt jö n curs de cater agn de lernerat o n percurs de cater agn a tëmp plëgn de na scora profescionala o che é tl stlü jö le percurs tl ann scolastich 2018. L’eté plü alta por podëi tó pert a chësc proiet é de 24 agn. Deache le curs de dui agn é ponsé por ciafé la maturité gnarál insigné materies dla formaziun generala. Les porsones interessades messará fá n ejam de amisciun che reverda materies generales sciöche todësch, matematica, economia aziendala, talian y inglesc.
Les curs sará partí sö te 1232 ores d’insegnamënt sön dui agn. I orars de leziun sará ti pröms trëi semestri dagnora en vëndres y sabeda, le cuarto semester gnarál ince insigné la jöbia.
Le datur de laur á ince te chësc caje düc i vantaji presënc te n contrat de lernerat tradizional, mëss indere ti dé lëde al lernert tratan les ores de leziun. Le lerner da süa pert é oblié da tó pert regolarmënter ales leziuns.
Por de plü informaziuns preibël contaté diretamënter la scora profescionala por l’artejanat y l’industria de Balsan, Tel. 0471 540703; E-mail: Rosy.Piaia@Schule.suedtirol.it o ince: http://www.provinz.bz.it/berufsbildung/ausbildung/1921.asp
USP
Galaria dales fotografies
