Atualità
Scora: Löm vërda ala formaziun dles classes y al organich
La Junta provinziala á aprové na delibera che regolamentëia la formaziun dles classes y les dotaziuns organiches tles scores por i proscims trëi agn de scora.
La delibera aprovada inier ai 13 de jügn dl 2017 dala Junta provinziala reverda les dotaziuns organiches tles scores elementares, mesanes y altes por i proscims trëi agn de scora cina l’ann 2019/20. La formaziun dles classes y la dotaziun di posć por le personal insegnant restará por i proscims trëi agn tan co anfat. Al é ma gnü deliberé de piceres mudaziuns d’organich che reverda dantadöt les scores talianes, da chëres che al é gnü sposté indöt 12 posć dales scolines ales scores.
Na novité é l’inserimënt de personal insegnant, che do n resultat dles inrescides iuridiches y dla sanité dl laur ne é nia adatada por l’insegnamënt. Confermé él ince gnü le numer di posć por la direziun y le coordinamënt di practicums di studënc dla Facolté de Sciënzes dla Formaziun a Porsenú. Pro l’organisaziun dles classes ti vëgnel damané ai suranstanc scolastics da formé les classes a na manira da garantí na spartiziun valia di studënc por ci che reverda le jëne, les capazités singulesdi scolars, le background de migraziun y d’atres carateristiches.
Contënt dla dezijiun é le vizepresidënt y assessur por la scora taliana Christian Tommasini: “Cun l’aprovaziun de chësta delibera él poscibl da adaté le numer di insegnanc al aumënt di scolars tles scores altes cun na scora tres plü plurilinguala y d’intlujiun.”Sodesfat é ince l’assessur por la scora ladina Florian Mussner che á recordé che “al sará poscibl da planifiché cun le medemo numer de porsones ince por le dagní a na manira da garantí ince ti proscims agns de scora n livel alt de profescionalité y da arjigné ca i scolars te na manira otimala al dagní.” L’assessur por la scora todëscia Philipp Achammer sotlignëia che “cun l’aprovaziun dla delibera da incö vëgnel garantí na planificaziun stabila por i proscims trëi agn. Chësc stromënt é de gran importanza ince por garantí na continuité ai studënc y insegnanc.”
USP
