Atualità
De dla rujeneda dla uma: plurilinguism valur important
Ai 21 de forá vëgnel recordé vigni ann da pert dl UNESCO l'importanza dl plurilinguism y dla rujeneda dla uma.
„Tl vers de n dagní sostenibl tres n’educaziun plurilinguala“ (Towards Sustainable Futures through Multilingual Education): chësc é le moto dl’ediziun anuala dl De dla Rujeneda dla uma organisé vigni ann ai 21 de forá dl 2017 dal’UNESCO por sotligné l’importanza dla rujeneda dla uma y dl plurilinguism. „Nosta scora ladina é n ejëmpl concret dl moto anual dl UNESCO cun le model paritetich che ne prevëiga nia ma l’insegnamënt te de plü rujenedes, mo ince la promoziun dla rujeneda y dla cultura ladina por formé nosta jonëza a avëi cosciënza dles raisc che é la basa por vire le plurilinguism sciöche na richëza y sostigní insciö la convivënza pazifica“, dij l’assessur por la scora ladina Florian Mussner. Fondamental é dantadöt l’insegnamënt dla rujeneda dl’oma che ne trasmët nia ma formes gramaticales y ortografiches mo che é ince na cöna dles tradiziuns y dles usanzes dl grup linguistich ladin, insciö Mussner. Tl dagní sarál dantadöt da lauré sön la promoziun dla rujeneda dla uma tres n’inrescida aprofondida de nostes raisc y ince tres les formes tecnologiches nöies, sciöche i social media y les app, che vëgn tres deplü anuzades dala jonëza, recorda l’assessur.
En guajiun dl De dla rujeneda dla uma vëgnel organisé indoman ai 21 de forá n convëgn sön la diversité linguistica. Tratan l'evënt organisé a Balsan sarál presënc de plü rapresentanc de plü grups linguistics che presentará les carateristiches particolares dles rujenedes y dles cultures. L’evënt vëgn organisé dales trëi Repartiziuns Cultura dla Provinzia y gnará a se le dé en mertesc ai 21 de forá dl 2017 dales 15.30 ales 18.30 tla curt interna de Palaz Widmann plaza Silvius Magnago 1 a Balsan.
usp
