Atualità
21 de forá: De dl Lingaz dla uma, evënt sön la diversité linguistica
La scomenciadia gnará tignida tl Palaz Widmann a Balsan en colaboraziun cun les trëi Repartiziuns Cultura dla Provinzia adöm ai assessurs por la cultura.
Le De internazional dl Lingaz dla uma é gnü detlaré dal’UNESCO por promöie la diversité linguistica y culturala y le plurilinguism y vëgn festejé ai 21 de forá de vigni ann. I trëi assessurs por la cultura Christian Tommasini, Florian Mussner y Philipp Achammer á l’intenziun da sotligné por l’ocajiun l’atenziun sön la diversité linguistica tl Südtirol. Tratan n evënt organisé a Balsan sarál presënc de plü rapresentanc de plü grups de lingaz y de cultura che presentará les carateristiches particolares dles rujenedes y dles cultures. L’obietif sará chël da sotligné l’importanza dles conescënzes linguistiches y de formaziun pro alisiré l’integraziun soziala y culturala. L’evënt vëgn organisé dales trëi Repartiziuns Cultura dla Provinzia y gnará a se le dé
en mertesc ai 21 de forá dl 2017
dales 15:30 ales 18:30
tla curt interna de Palaz Widmann
plaza Silvius Magnago 1
a Balsan.
Le program prevëiga naota i salüc da pert di assessurs dales 15:30, spo le salüt da pert dla presidënta dl VKE Fernanda Mattedi y de conseguënza dales 15:50 fajará Sonja Logiudice dl Ofize Formaziun permanënta y Laura Sedda dl VKE de plü osservaziuns. Dales 16:30 sarál Fatima Giafari y Gianluca Battisetl che cunta de sües esperiënzes personales imparan n lingaz forest. Dales 17:00 inant cina ales 18:30 gnarál a se le dé che de plü rapresentanc de de plü grups de lingaz rajonará de sües esperiënzes y conescënzes culturales y linguistiches. Rapresentanc dles trëi Repartiziuns dla Provinzia sará ince a desposiziun pro informaziuns sön les poscibilités y i aiüc che la Provinzia pita canche al se trata de imparé n lingaz ofizial dla Provinzia.
usp
