Atualità
Reconoscimënt por i 108 maturanc cun la valutaziun plü alta
Na picera festa é gnüda organisada incö 29 de dezëmber a Balsan por i maturanc jogn adöm al vizepresidënt Tommasini y ai assessurs Mussner y Achammer.
„I sëis importanc por döta la sozieté südtiroleja!“ chësc é sté le messaje dl vizepresidënt dla Junta provinziala Christian Tommasini ales jones y ai jogn che á superé chësc ann l’ejam de madoranza cun la valutraziun plü alta. Le vizepresidënt ti á ince porté les mius aodanzes da pert dl presidënt dla Provinzia Arno Kompatscher che é a Roma y de döta la Junta provinziala. Le vizepresidënt á ince sotligné le valur ajuntif dl plurilinguism che dess gní adoré y valorisé por se sintí de plü a ciasa y por avëi de plü poscibilités tl monn dl laur. „Ester i mius é ince na responsabilité da realisé ostes ghiranzes mo ince da daidé la sozieté por se svilupé tla dërta direziun. Por merit dl’autonomia provinziala él bele gnü realisé tröp y tosc sarál ince osta responsabilité da governé le bëgnester cherié, por os y por döta la sozieté“, insciö Tommasini.
Ince l’assessur por la scora ladina Florian Mussner á rengrazié i jogn maturanc cun la valutaziun plü alta y ti á fat i complimënc por chësc resultat d’ezelënta. L’assessur ladin á recordé l’importanza da studié foradecá, na poscibilité da adoré por se confronté y se baraté fora cun n monn tres plü global. „Por capí i avenimënc atuai che reverda la globalisaziun mondiala él ince nezesciar da se confronté cun atres realtes, cun la cultura che resta n punt frëm por l’azetaziun dla diversité, adöm ales esperiënzes fates“, insciö Mussner. I jogn é tl zënter de chësc svilup ince pro merit dla preparaziun por ti dé n contribut a döta la sozieté südtiroleja cun l’integraziun de esperiënzes europeiches y mondiales, sotlignëia l’assessur che á ince recoré la gran importanza dla scora y di insegnanc, por chi che la politica formëia la basa nezesciara por sostigní la formaziun di jogn. 100 punc cun lalda á arjunt Elena Moroder (Istitut tecnich economich Raetia), 100 punc á arjunt Sandra Pedevilla (Scora d’Ert Cademia), Cristina Stuffer (Lizeum scientifich y di lingac y scora profescionala „Jakob Philipp Fallmerayer“ da Porsenú), Oliver Irsara (scora alta por l’economia, grafica y comunicaziun „Julius und Gilbert Durst“ da Porsenú) y Noemi Dapunt ( Lizeum sozial y scora d’ert da Bornech).
L’assessur por la scora todëscia Philipp Achammer á sotligné por l’ocajiun le bun resultat di 100 punc sön 100 che resta tres, deache al desmostra impëgn, determinaziun y ince conzentraziun da sostigní les proes. „Al é n’aodanza che i jogn sides bugn da apliché chëstes cualités ince al intern dla sozieté por dé n contribut de svilup“, insciö Achammer recordan che la sozieté südtiroleja á bojëgn dl otimism y dla chersciüda dla jonëza. Ala zerimonia en onur di studënc tl Palaz Widmann a Balsan ál ince tut pert l’intendënt dla scora ladina Roland Verra y dla intendënta por la scora taliana Nicoletta Minnei. L’evënt é gnü abelí dala musiga dl grup "Messing around" dla scora de musiga de Gries.
USP
Galaria dales fotografies
