Atualità
„Suri“: Material didatich nü por scolines y scores
Le Ciamp Inovaziun y Consulënza á organisé incö la presentaziun dl cufer „Suri“ che arichësc l’oferta didatica ponsada aposta por le monn dla formaziun ladin.
N möt che vá fora le monn cun so pere y n müsc a chirí le consëns dla jënt, che al ne ciafa sambëgn nia, n ël gran y gros che vëgn striné tl cör frëit y grisc de n zbergl, dui fredesc che röia pro n ander plëgn de monëdes d’or y peres prezioses: chisc é i protagonisć dles cater stories contignüdes tl liber »SURI« che le Ciamp Inovaziun y Consulënza dl Departimënt Educaziun y Cultura ladina á presenté incö jöbia, ai 15 de dezëmber, tla scolina d’Al Plan de Mareo. La publicaziun é destinada ales scolines y ales scores mo ince a n publich plü ampl de mituns che mët man da lí instësc stories y de adulc che ó ti lí dant na storia ai pici. Ara se trata de n liber ilustré che contëgn cater stories scrites por ladin, talian, todësch y inglesc. Por sostigní l’aprendimënt di lingac él gnü svilupé pro vigni titul materiai surapró che an ciafa te na confeziun didatica completa, che contëgn consëis metodologich-didatics y che dá la poscibilité da surantó propostes de laur cun material adaté insciö da podëi jí plü sot tl contignü, tla comprenjiun y tla elaboraziun dles stories.
Le material didatich nasc sciöche proiet de cater studëntes ladines dla Univerité Lëdia de Balsan tla Facolté de Sciënzes dla Formaziun a Porsenú. Tratan les leziuns de „Didatica dl lingaz dla uma“ cun le profesur Rico Cathomas, á Katrin Crazzolara, Carmen Insam, Barbara Kasslatter y Michela Prinoth lauré fora n pice sföi por la scolina pian ia dal liber „Stories“ che l’Istitut Pedagogich Ladin â dé fora dl 2007. Ares á chirí fora cater stories, les á scemplificades y laurades fora didaticamënter por mituns y mitans tl’eté dla scolina. Le proiet é spo gnü tut sö da Inovaziun y Consulënza y lauré fora ciamó n iade ince sot l’aspet dla didatica integrada cun l’aiüt dla maestra dla scolina Michela Prinoth. „L’archirida de material didatich adaté é na sfida costanta por düc y dötes che laora tl monn dla scolina y scora. Sce al é spo le personal pedagogich enstëss co se dá jö con la produziun de material, spo porta chësc sogü ciamó plü cualité“, dij l’ispeturia dles scolines ladines Edith Ploner.
Le proiet »Suri« é gnü coordiné con gran pasciun y lizitënza da Claudia Rubatscher, colaboradëssa de Inovaziun y Consulënza. Sce al é garaté n proiet co porta ligrëza bele da ti ciaré, spo é chësc ince n merit de Anita Demetz, che á surantut y porté tres la ligna grafica, sides dal liber y dal cufer.„Les cater stories fej insciö pert dla seria de material didatich lauré fora aposta por la realté ladina che promöi i trëi lingac provinziai adöm al inglesc dala scolina insö, te na vijiun integrada y creativa y en continuité cun la scora elementara“, dij le diretur Inovaziun y Consulenza Felix Ploner. Inovaziun y Consulënza á te so fin istituzional dantadöt le compit dl svilup y la produziun de materiai didatics. Ara se trata chiló de libri, material didatich, material audiovisif, che n’é nia da ciafé sön le marcé general y chi mesi didatics, che pó aumenté la cualité dl insegnamënt y aprendimënt. Chëste publicaziuns vëgn svilupades y publicades por les mët a desposiziun al monn dl’educaziun dala scolina insö.
Le liber "Suri" pó gní cumpré pal’Istitut Micurá de Rü a S. Martin y te Sëlva al prîsc de 15 Euro y pó gní damané do da düc tres le Ciamp Inovaziun y Consulënza – pedagogich.it.
USP
Galaria dales fotografies
