Atualità
Abilitaziun por insegnanc: Löm vërda por le secundo curs universitar
La Junta provinziala á aprové incö les condiziuns por l’esecuziun dl secundo curs universitar de formaziun por ciafé l’abilitaziun da insegnanc.
Tl ann academich 2016/17 podará l’Université Lëida da Balsan istituí n secundo curs universitar de formaziun por ciafé l’abilitaziun da podëi insigné tles scores mesanes y altes. La Junta provinziala á aprové incö ai 15 de novëmber la proposta dl assessur por la formaziun Philipp Achammer che contëgn les diretives por l’esecuziun dl curs de formaziun.
„Cun l’aprovaziun dla lege statala dla reforma scolastica „La Buona Scuola“ él la Provinzia che á ciafé na seria de competënzes implü“, á splighé incö l’assessur por la formaziun Philipp Achammer tratan la conferënza stampa do la sentada dla Junta provinziala. La lege prevëiga danter l’ater che la Provinzia pó stabilí te na manira autonoma adöm al’Université y le Conservatorium la formaziun profescionala, pedagogica y didatica dl personal scolastich sciöche ince les modalités y i contignüs di ejams. „Impormó dan da püch él sté la Junta provinziala che á aprové les diretives por le master de sciënzes dla formaziun por le setur primar en colaboraziun cun l’Université Lëdia da Balsan y les trëi Intendënzes. La Provinzia pó sëgn cun chëstes döes deliberaziuns tres deplü regolamenté la formaziun di insegnanc por ti respogn te na manira otimala ales esigënzes locales“, insciö dij Achammer.
L’assessur Achammer sotlignëia inant che „l’Intendënza todëscia laora bele da plü mëisc por arjunje le reconoscimënt de abilitaziuns da insegné fates te Stac dl’Uniun europeica por personal didatich dles scores ladines y todësces.“ Cun la delibraziun da incö él incne gnü stabilí les prozedöres d’ejame, la composiziun dles comisciuns, i titui, les modalités y le numer di posć. A desposiziun él dötadöm indöt 160 posć de formaziun por candidac todësch y 14 por candidac ladins. La prozedöra de seleziun gnará partida sö te na pert a usc y scrita por podëi ejame sides les competënzes teoretiches co ince comunicatives, soziales y de linguistiches.
USP
