Atualità
Cultura ladina: aprová i criters nüs por le sostëgn economich
Le regolamënt completëia la reforma dla lege culturala nöia cun novités por ci che reverda prozedöres plü efiziëntes y adates ales normes europeiches.
La Junta provinziala á aprové sön proposta dl assessur por la cultura ladina Florian Mussner incö mertesc ai 18 d’otober 2016 le regolamënt d’atuaziun dla lege sön les ativités culturales nöies de ai 27 de messe ai 2015 nr. 9. „Cun i critérs nüs é les prozedöres por i contribuc gnüdes scemplificades cun vantaji por l’efiziënza y por l’adatamënt ales normes europeiches tl setur che reverda la gestiun dles domandes“, spliga l’assessur por la cultrua ladina Florian Mussner.
Öna dles novités prinzipales é aladô de Mussner la poscibilité de se damané n’antizipaziun dl 90% sön le contribut conzedü (cina sëgn gnêl conzedü l’80 porcënt), chësc por garantí licuidité ales lies culturales. Al é ince gnü aumenté a 4.000,00 € l'import por les sovenziuns, che rapresënta na forma manco burocratica de contribut.
An recorda ince che, a gaujia dles nöies normes en materia de bilanz, mëssun da segn inant rendiconté le contribut por l'ativité culturala ordinara nia plö tert dl 31 de dezëmber dl ann do che an á fat l'ativite. Por ci co reverda i proiec y i investimënc mëssun dé dan n chronoprogram y se tigní avisa a chësc program.
Danter les novités prinzipales él, insciö l’assessur Mussner, la poscibilité da damané do vantaji economics de plü agn che dess garantí continuité tla programaziun dles ativités y manifestaziuns culturales. Danter les condiziuns por fá domanda do n sostëgn plurianual él la demostraziun de n’ativité plurianuala, cun n conzet cultural planifiché bele danfora y che prevëiges spëises finanziares altes y cun na sënta d’organisaziun dl’istituziun tl Südtirol.
Implü él contigní tl regolamënt nü ince l’aprovaziun di criters por la presentaziun dles domandes, la documentaziun da injunté, i criters de valutaziun dles domandes, les funziuns dles Consultes culturales, la definiziun dles spëises ametüdes por investimënc, ativités y scomenciadies y la destinaziun di vantaji economics. Implü vëgnel ince regolamenté avisa la rendicontaziun y les domandes di licuidaziun tles categories desvalies y i controi.
I criters renová gnará aplicá por les domandes che reverda l’ann 2017 y chi daldô. Por informaziuns plü monüdes y spligaziuns prëibel contaté l’Ofize Cultura ladina (0471 / 41 70 21; barbara.perathoner@provinz.bz.it; alexander.piccolruaz@provinz.bz.it
rc
