Atualità
La ripartizion per la frumazion profesciunela ladina y tudëscia sun la fiera de Bulsan
OSP – Nfurmazions de utl sun la frumazion profesciunela de rujeneda ladina y tudëscia vën presentedes da n sada, 13 de setëmber 2003 sun l stond dla ripartizion per la frumazion profesciunela ladina y tudëscia dla 56esma fiera nternaziunela da d’autonn a Bulsan. Tl zënter dla presentazion sarà la scoles profesciuneles cun si vela de ufertes defrëntes. Sun l program iel pona nce de plu uneranzes per cursc dla frumazion profesciunela ladina y tudëscia. Ai 21 se presenta la scola profesciunela per l atejanat artistich de Gherdëina.
La Provinzia de Bulsan ie rapresenteda cun de plu ripartizions sun la 56esma fiera nternaziunela da d’autonn a Bulsan. I stonc dla Provinzia unirà metui su tla pert D 24-16 dla fiera. Te chësta pert se presënta nce la ripartizion per la frumazion profesciunela ladina y tudëscia. Bele dal prim di dla fiera da d’autonn, n sada ai 13 de setëmber, possa i vijitadëures se nfurmé sun la „patent europea per l computer ECDL“ dala 10 danmesdi inant. Esperc nternaziunei spiegherà dut chël che ie de utl per arjonjer la certificazion cunesciuda. Tres n test pudrà uni un museré si cunesciënzes. Chësta uferta unirà mo piteda da n merdi ai 16 nchin a juebia 18 de setëmber. Ntan i dis da lëur sarà i esperc dala doi domesdi a desposizion per dumandes dla jënt. N dumënia ai 14 de setëmber dala doi domesdi, y pona n lunesc ai 15 de setëmber dala 10 danmesdi presenterà la scola profesciunela de Burnech l pachetl de software "AutoCAD". La scola profesciunela de Burnech ie un di puec zëntri de test dla provinzia per l "AutoCAD". Rapresentanc dla scola spiegherà l program, y mustrerà i dessënies y proiec che ie unì fai sun l computer. Mplù pudrà i vijitadëures se nuzé dl’ucajion de purvé nstëss a lauré cun chësc program. Ora de chësta vela de nfurmazions uniral sun l stond dla ripartizion per la frumazion profesciunela ladina y tudëscia nce sëurandat de plu diplomes per cursc profesciunei. Scumencià uniral cun chisc n mierculdi ai 17 de setëmber dala cinch domesdi canche l unirà unerà chëi che à fat pea l curs per sartëur da trochtes tla scola profesciunelade Maran "Luis Zuegg". Tlo pudran nce udëi si lëures. Doi uneranzes ie sun l program de n vënderdi ai 19 de setëmber, dala cater domesdi uniral sëurandat diplomes a chëi che a finà l „curs de zapé ite da nuef te ufize“, dala cinch domesdi sarà l mumënt di traineri de wellness. La sada ai 20 de setëmber unirà dedicheda al’energia dl surëdl. Ntan dut l di uniral dat inant nfurmazions sun l’energia dl surëdl y presentà proiec y tesc’. Per l’ucajion iel unì nvià l espert tl ciamp dl’energia dl surëdl Wilhelm Kirchensteiner dl zënter de furmazion profesciunela per eletronica de Minca. Da mesa la doi uniral pona sëurandat i diplomes per i „solardëures“. N dumënia ai 21 saral pona mo la scola profesciunela per l artejanat artistich de Gherdëina a stlu jù la manifestazion. Tla „berstot viva“ pudran nrescì cie che l vën pità te chësta scola y nce cialé pro coche l vën laurà.OSP
