Atualità
Cultura ladina: „L’anima dla viera“ – relazion ai 27/10 tla Galaria Prisma
L’anima te situazions dramatiches sciche tl cuntest de viera sarà tl zënter dl referat “L’anima dla viera – La viera tl’anima“ tenì dal dutor spezialisà te psichiatria y psicoterapia Mario Horst Lanczik ai 27 d’utober dala 19.00 tla Galaria Prisma a Bulsan. La relazion fej pert dla curnisc dla mostra 1915-2015 metuda a jì dala Repartizion Cultura ladina y dal Südtiroler Künstlerbund.
Na viera ne sarà mei giusta o da giustifiché. Na viera ne vën mei venciuda, te na viera possen mé pierder. La viera ne lascia nia mé sënies sun nosc corp, ma dantaldut nce tl’anima y chësc suvënz per generazions. N ucajion dla mostra 1915-2015 nvieia l Südtiroler Künstlerbund deberieda cun la Repartizion Cultura y Intendënza ladina ala relazion “L’anima dla viera – La viera tl’anima” che unirà tenida
n merdi, ai 27 de utober
dala 19.00
tla Galaria Prisma
a Bulsan.
Le relazion unirà purteda dant dal dutor spezialisà te psichiatria y psicoterapia, l dut. med. Mario Horst Lanczik, che ie nstës stat tla viera y che tenirà n referat sun l’anima y la viera y la situazion psichica di saudeies y dla populazion te situazions dramatiches sciche tl contest de viera. L nvit ie unit njuntà.
Dan l referat, dala 18.30 menerà Lisa Trockner tres la mostra. La mostra 1915 -2015 ie da vijité tla Galaria Prisma nchin ai 31 d’utober: da udëi iel l'operes premiedes n ucajion dl cuncors artistich sun l centené dla Prima viera mundiela metù a jì dala Repartizion Cultura ladina y dal Südtiroler Künstlerbund. L ie da udëi la operes dl'artistes y di artisć Paul Feichter, Silvia Hell, Annemarie Laner, Walter Pancheri, Leander Schwazer, Martina Stuflesser, Letizia Werth y Andreas Zingerle. La tematiches zentreles dla mostra ie: i destins dla populazion zevila, l’emozions danter cumpascion y sënn, la gaujes y la giustificazions che ie for la medemes. Te chësta mostra vën la viera, si fazion y si cunseguënzes presentedes te si aspec defrënc.
La mostra, cureda da Lisa Trockner, resta davierta nchin ai 31 d’utober da n merdi a n sada dala 10.00 ala 12.30 y dala 16.00 nchin ala 19.00
USP
