Atualità
La Junta provinziala á aprové 34 miliuns d'euro por l’assistënza scolastica
Por l’ann scolastich 2015/16 á la Junta provinziala planifiché na soma de 34,2 miliuns de euro sciöche mesi por le finanziamënt dl’assistënza scolastica. „Ma por mirit de n sostëgn adaté ai bojëgns dl’assistënza scolastica pól ince gní garantí i medemi dërc al’istruziun por düc“, sotlignëia l’assessur Philipp Achammer.
La Junta provinziala á aprové incö (mertesc ai 16 de jügn) te süa sentada edemala le plann dles ativités por l’assistënza scolastica 2015/16 y metü a desposiziun mesi finanziars por indöt 34,2 miliuns de euro. „Pro chisc – á prezisé l’assessur Achammer – röiel ciamó lapró 19,8 miliuns de euro de stipendiums por i studënc dles universités: na soma importanta, che vëgn metüda a desposiziun por ti pormët a düc i studënc y dötes les studëntes dl Südtirol oportunités de stüde valies y i medemi dërc d’azes al’oferta formativa tl Südtirol y tles universités foradecà.“
Por ci che reverda la spartiziun di mesi finanziars dl’assistënza scolastica aprovada incö (34,2 miliuns), ti vëgn la plü gran pert de 7,6 miliuns de euro assegnada al trasport di scolars che ne pó nia s’anuzé de corieres y/o ferates de coliamënt cun les scores. La Provinzia organisëia insciö por indöt 5mile scolars 550 iadi de trasport speziai, cun na spëisa mesana de 1.500 euro al’ann por scolar. “ La secunda pert plü grana, 7,2 miliuns di euro ti vëgn conzedüda por stipendiums ai studënc dles scores altes y profescionales“, insciö l’assessur Achammer. Indöt 2,2 miliuns de euro mët la Provinzia a desposiziun por le trasport y le sorvisc d’acompagnamënt di scolars cun handicaps por l’ann 2015/16.
„N’atra spëisa che vëgn garantida dala Provinzia é l’assegnaziun di libri che vëgn partis fora debann a düc i scolars y les scolares che frecuentëia les scores d’oblianza“, á recordé Achammer che á sotligné che al gnará mantigní inant l’assegnaziun de valur di 150 euro da adoré dantadöt por la cumpra de tesć scolastics a bëgn di mituns che frecuentëia i ultims trëi agn dles scores altes. N ater contribut important reverda le sorvisc dla mensa, che vëgn sostigní cun 5,7 miliuns de euro (che fej fora le 40 porcënt di cosć di Comuns). Inultima vëgnel garantí cun 350mile euro le pest d’assicuraziun por düc i 85mile mituns y studënc dles scores dl Südtirol cuntra le prigo d’inzidënc sides al intern di frabicac dles scores, co sön la trata danter la ciasa y la scora.
rc
