Atualità
Rujenedes, cultura y sport: 16 sculeies dl ITE Raetia tla Spania
Jì cun la roda y cun la berca, se eserzité tla rujeneda y viver la cultura: n ch’sta dì à 16 sculeies dla cuarta tlas dl ITE Raetia passà n’ena a Alcazár de San Juan tla Castilla-La Mancha tla Spania. Urganisà ie l proiet “Richëza linguistica y sport” unit tl cheder dl program de barat “Erasmus +”.
Miuré la cunescënzes linguistiches, fé amezizies nueves, fé sport y se arichì culturalmënter – de chësc program cun truepa ativiteies à pudù se nuzé 16 sculeies dla 4B tlas dla ITE Raetia de Urtijëi n ucajion de na permanënza a Alcazár de San Juan, n luech a sud de Madrid tla provinzia Castillia-La Mancha. „Cun l viac tla Spania ons da una na pert ulù che i sculeies posse se eserzité y adurvé tla pratica si savëi teorich dla rujeneda spanuela y dal’autra pert nce recunëscer l utl dl aprendimënt linguistich. Ëi à pudù nsci se nuzé de una dla truepa pusciblteies che la Union europeica pieta y tres chëla che on pudù finanzië l viac y la permanënza tla Spania” tlarësc Bruno Senoner, l diretëur dl ITE Raetia de Urtijëi. L ie dantaldut per i jëuni de mpurtanza udëi l gran utl che possa se purté pro dala istituzions europeiches per sustenì l barat culturel y linguistich tl’Europa, nsci l diretëur Senoner.
„Tl cheder dl program de barat Erasmus+, che vën finanzià dala Union europeica, à i sculeies dai 18 ai 25 d’auril pudù purvé ora na lingia d’ativieteies sportives sciche per ejëmpl jì cun la berca o cun l kayak o fé geocaching dajan te chisc cuntesć nce for truepa mpurtanza a mparé l spanuel", spliga l maester Simon Stuffer, che à acumpanià la tlas adum cun la maestres Carol Pycha y Katrin Kostner. I sculeies ne à ntan ch’sta permanënza tla Spania nia mé fat amezizies nueves, ma nce udù truep dla cultura spanuela, sciche per ejëmpl l “Museo del Prado” a Madrid, la ziteies Valencia cun l majer cumples d’acuariums dl’Europa, l museum dla scienzes “Principe Felipe” y l’opera cuntemporera, la zità medievela de Toledo, i mulins a vënt tipics sciche nce la cuntreda di lec y dla stepes dla provinzia de "La Mancha".
Dai 10 ai 17 de jené dl 2015 fova na delegazion de 20 sculeies spanuei cun si nsenianc unic a Urtijëi y tl Südtirol. N chësta ucajion ài pudù cunëscer la cultura plurilinguistica te Gherdëina y fé d’uni sort de ativiteies sportives da d’inviern. Sun l program ovi jì cun i schi, jì cun i jadins, tudësch y ladin y mo truep deplù. “N gran rengraziamënt ti va ala Ntendënza ladina, dantaldut a Brigitte Pedevilla dl servisc per l sport de scola che à crià l cuntat cun la scoles spanueles”, nsci i urganisadëures dl ITE Raetia.
usp
Galaria dales fotografies
