Atualità
Inovaziun y Consulënza pro les biblioteches scientifiches de Südtirol
Plü visibilité y n azes alisiré ai libri ince da ciasa o dal post de laur: la biblioteca dl Ciamp Inovaziun y Consulënza dl’Intendënza Ladina fej pert da püch, sciöche ince la biblioteca dl Istitut cultural „Micurá de Rü“ y tröpes d'atres dl catalogh digital „Wissenschaftsbibliothek Südtirol“ dl’Université da Balsan.
La biblioteca dl Ciamp Inovaziun y Consulënza fej pert da püch dl sistem de racoiüda digital dles biblioteches scientifiches dl Südtirol „Wissenschaftsbibliothek Südtirol“ metü adöm dal’Université da Balsan. „Chësta ajunta porta para plü vantaji por le monn dla scora, academich y pro düc i interessá: da öna na pert ti dá chësc vare plü visibilité ales publicaziuns dla biblioteca che reverda suradöt la cultura y la storia ladina, mo ince dla didatica y pedagogia, dal’atra pert sarál plü saurí y comot da s’impresté fora i libri tres na prenotaziun digitala söl computer“ spliga l’assessur por la scora ladina Florian Mussner. Da sëgn podarán insciö, cun na cherta aposta y tres la prenotaziun sön le sit dla rëi dles Biblioteches, s’impresté fora libri dala Biblioteca dl Ciamp Inovaziun y Consulënza da Balsan y jí ai tó tles sëntes dl Istitut Ladin „Micurà de Rü“ a San Martin de Tor y ince a Bornech y Porsenú. "Sëgn éra tan inant che döt le patrimone de libri y d’atri mesi dl Ciamp Inovaziun y Consulënza é online cun le gran sostëgn dla Université de Balsan y cun la bela oportunité di interessá, da podëi consulté le catalogh di libri da scora infora, dal post de laur o bel comot da ciasa infora", dij le diretur Felix Ploner.
Les biblioteches bele colegades y che gnará ciamó tacades ite a OPAC é la biblioteca zentrala dl’université de Balsan-Porsenú, la biblioteca dl Istitut Ladin „Micurá de Rü“, la biblioteca dl Museum de scienzës naturales a Balsan, chëra dl „Bibliotheksverband Südtirol“, dl „Museion“ da Balsan, dla scora profescionala de Laimburg, dla Academia Europeica „Eurac“, dl Bereich Innovation und Beratung por les scores todësces, chëra dla facolté filosofica-teologica de Porsenú, dl Ofize por la integraziun europeica (AEU).
La biblioteca dl Istitut Pedagogich Ladin é gnüda metüda sö dan da plü co vint agn, defata do che l’Istitut ê deventé operatif. Le patrimone di libri ê ponsé por insegnanc y insegnantes dles valades ladines, porchël fajô fora impröma de döt i libri de pedagogia, de didatica y de psicologia na buna pert de döta la racoiüda. Man man êl gnü cumpré sö libri de storia y geografia locala, de filosofia, de leteratöta, scric ti trëi lingac de nosta Provinzia, mo sambëgn êl gnü metü l’azënt sön i tesć scric por ladin. Ti agn ê la biblioteca gnüda ampliada y ara gnô arichida, inanter l’ater cun de vigni sort de tesć scolastics. Na buna pert di libri ê gnüs metüs a desposiziun dles scores tla biblioteca de Badia y spo de La Ila y a Urtijëi tla Bibliotech San Durich.
Le Ciamp Invoaziun y Consulënza sotlignëia che „la digitalisaziun á porté pro a odëi les cosses cun n ater edl, porchël ân conscidré che al é bun, sce na picia biblioteca spezialisada vëgn tuta ite te n maiú sistem digital, che deura indô portes nöies.“ La biblioteca dl Ciamp Inovaziun y Consulënza é da ciafé tla sënta dl Departimënt Educaziun y Cultura Ladina, tla strada Binder/Bottai 29 a Balsan, oalche al pól gní consulté libri, ascuté CDs, o ciaré a DVDs y lí te foliec o revistes. Por plü informaziuns: http://www.pedagogich.it/
rc
