Atualità
„Grafia nöia: Ladin dla Val Badia“ – Codejel online
Le Ciamp Inovaziun y Consulënza informëia che da incö, vëndres ai 17 de aurí, él da ciafé sön süa plata internet ofiziala n codejel de presentaziun y spligaziun dla grafia nöia dl Ladin dla Val Badia. N codejel te na verjiun stampada cun dötes les informaziuns ti gnará proscimamënter metü a desposiziun ai insegnanc y ales insegnantes dles scores ladines dla Val Badia.
Le sföi »Grafia nöia - Ladin dla Val Badia« vëgn metü a desposiziun dal Ciamp Inovaziun y Consulënza y é n ressumé dles regoles dla grafia dl ladin scrít dla Val Badia cun lapró les ultimes mudaziuns. „Al dess ester n aiüt pratich por düc chi che scrí tesć por ladin, anfat sce por fins privac o te na forma ofiziala“, spliga le diretur dl Ciamp Inovaziun y Consulënza Felix Ploner.
Le fin prinzipal dla reforma dl’ortografia ladina é chël de scemplifiché les regoles por che i ladins dla Val Badia se fejes plü saurí da scrí, zënza messëi avëi tëma de falé jö i azënc. Les regoles plü scëmples y tleres dess implü alisiré le laur di insegnanc dles scores. Por lascé a desposiziun le tëmp che va debojëgn da imparé les regoles nöies, él odü dant n tëmp de transiziun de 3 agn, tratan chël che al vëgn lascé avarëi sides l'ortografia vedla co la nöia.
Le documënt de scemplificaziun é gnü firmé ai 23 de merz dal assessur por la cultura ladina Florian Mussner, dal intendënt Roland Verra y dal presidënt dl Istitut ladin Micurà de Rü Albert Videsott y la grafia scemplificada pó porchël gní adorada ofizialmënter pro i ac publics, tles scores y pro les publicaziuns nöies.
Les regoles d’ortografia nöies é gnüdes laurades fora en colaboraziun cun de plü rapresentanc dla scora ladina, l’intendënt Roland Verra, les ispeturies Rosmarie Crazzolara, Edith Ploner, la direturia Claudia Canins, le diretur Otto Moling, le diretur Felix Ploner, les insegnantes Magdalena Miribung, Cristina Castlunger y Maria Frenner, le presidënt y le diretur dl Istitut Ladin »Micurá de Rü« Albert Videsott y Leander Moroder, i colauradus dl Istitut Sara Moling y Werner Pescosta, le professur de ladin dl’Université de Balsan Paul Videsott y l’assessur Florian Mussner.Por düc i interessá él poscibl da desciarié le codejel sot a: http://www.pedagogich.it/index_frame.html
Por plü informaziuns prëibel contaté l’Istitut Ladin Micura de Rü (0474 523110) y/o l’Intendënza Ladina (0471 417000) che é a desposiziun de düc i interessá por informaziuns, stlarimënc y spligaziuns.
rc
