Atualità
Pröma sentada deboriada dles trëi Consultes di Jogn
Les Consultes di Jogn di grups linguistics ladin, todësch y talian s’á incunté incö, 26 de merz, a Balsan por na pröma sentada deboriada. „Sciöche ënc de consulënza dla Junta pro tematiches che reverda i jogn á les consultes na funziun importanta che dess tl dagní gní portada inant tres de plü te na manira coletiva“, á sotligné i assessurs Florian Mussner, Christian Tommasini y Philipp Achammer.
Por renforzé la colaboraziun danter i trëi grups linguistics dl Südtirol y por aumenté la rëi de colaboraziun danter les Consultes di Jogn, s’á incunté incö, jöbia ai 26 de merz, les trëi Consultes di Jogn cun i assessurs por la scora y cultura Florian Mussner, Christian Tommasini y Philipp Achammer por na pröma sentada costituënta deboriada a Balsan. Un di fins prinzipai dl’incuntada é sté chël da imparé da se conësce danter i rapresentanc por lauré fora punc de comunanza dles tematiches che reverda la jonëza. Te grups da trëi á i rapresentanc dles consultes lauré fora prömes propostes de colaboraziun.
„I ún debojëgn di consëis dla jonëza por podëi lauré fora adöm strategies por le dagní. Te chësc contest ne dess les rujenedes y la cultura nia gní odüdes sciöche impedimënc mo sciöche n arichimënt por sostigní deboriada idees y propostes nöies“, á sotligné l’assessur por la scora y cultura ladina Florian Mussner. L’assessur por la cultura taliana Christian Tommasini á recordé l’importanza dla colaboraziun dles trëi Consultes di Jogn sciöche n sëgn de comunanza por döta la sozieté. „Ma lauran adöm podunse manaje les sfidades dl dagní ti seturs dla cultura, formaziun, dl abité, dla sozieté y tl ciamp dl laur“, insciö Tommasini. L’assessur por la cultura todëscia Philipp Achammer á recordé che „la Junta provinziala tolará en conscidraziun sceriamënter les propostes che gnará portades dant dales rapresentanzes dla jonëza.“
Les Consultes di Jogn di trëi grups linguistics é gnüdes nomiades ai 03 de forá dala Junta provinziala sön proposta di assessurs Florian Mussner, Christian Tommasini y Florian Mussner.
Tratan n’incuntada de preparaziun ala sentada da incö s’á la Consulta di Jogn dl grup linguistich ladin bele dé jö cun valgügn punc che reverda danter l’ater la tematica dl sostëgn di jogn tratan la chirida o la cumpra de abitaziun nöies. Por ci che reverda l'inciaria de presidënt dla Consulta di Jogn dl grup linguistich ladin él gnü nominé Gottfried Nagler, che é bele sté le vizepresidënt tla legislatöra da denant. Por la inciaria de vize-presidënta é l’inciaria jüda a Lena Musler.
Les Consultes di Jogn é formades da porsones jones y da porsones che se dá jö cun la jonëza, che vëgn nominades dales assoziaziuns di jogn y dai Comuns. Implü fejel ciamò pert dla Consulta n rapresentant / na rapresentanta dl Consëi Scolastich provinzial. Le compit prinzipal dles Consultes di Jogn é chël da aconsié la Junta provinziala sön tematiches che reverda i jogn y dá jö arac sön le finanziamënt de proiec y sorvisc por i jogn. Ares á ince la funziun de aconsiadëssa pro l’elaboraziun de propostes de lege y inrescides che reverda la jonëza. La basa iuridica dl’ativité y dla formaziun dles Consultes é la lege provinziala nr. 13 dl 1983.
rc
Galaria dales fotografies
