Atualità
Colié scora y cultura por aprofondí la tematica di conflic
Aprofondí les tematiches di conflic te süa aspec plü desvalies por renforzé l’importanza di valurs dla convivënza y dla pesc: chisc é stá i fins prinzipai di proiec culturai metüs a jí dala Repartiziun dla Cultura y Intendënza ladina tles scores mesanes y altes dla Val Badia y te Gherdëina y coordiná da Erika Castlunger.
En ocajiun dl centenar dla Pröma Vera Mondiala á la Repartaziun dla Cultura y Intendënza ladina metü a jí de plü proiec sön chësta tematica tles scores mesanes y altes dla Val Badia y de Gherdëna. Chisc proiec é gnüs coordinà da Erika Castlunger y laurá sö te na manira interativa dai scolars che i á spo presenté al publich.
Les tlasses á lauré sö te formes interatives i aspec desvalies dla tematica di conflic en ocajiun dl aniversar dl scomënciamënt dla Pröma Vera Mondiala por i presenté spo al publich. „Colié la scora y la cultura é n aspet fondamental por renforzé la cosciënza de nosta storia por imparé dai avenimënc storics y por mët la basa por n dagní de convivënza pazifica te nüsc raiuns. Jì n pü’plü sot tles dinamiches di conflic dëida a capí che vignun y vignöna de nos á le dovëi sozial y zivil da colaboré por soluziuns pazifiches,“ recorda l’assessur por la scora y cultura ladina Florian Mussner.I proiec é gnüs coordiná da Erika Castlunger che á svilupé tres na rapresentaziun teatrala n’odüda spezifica dla tematica dl conflit adöm ales tlasses scolastiches y ai insegnanc. „I scolars y studënc é piá ia dala pröma vera mondiala sciöche forma de conflit por aprofondí les dinamiches de conflit te na manira plü ampla, tres n’analisa di aspec storich, sozial, cultural, psciologich y personal“, spliga la coordinadëssa Erika Castlunger.
I studënc y les studëntes dla pröma y dla secunda tlassa dl lizeum linguistich y dles sciënzes umanes da La Ila á insciö lauré fora n proiet teatral dal titul „War is Hell“ („La vera é l’infêr“), che ai á porté da püch sön paladina tla Ciasa dla Cultura da La Ila. I studënc y les studëntes s’á dé jö te de plü materies cun tesć sön le contest dla vera en general por daldô mët adöm n collage de scenes sön les situaziuns tratan la vera.
Tres tl contest dl proiet analisëia la secunda tlassa dla scora mesana da Sëlva la biografia de Malala, portadëssa dl pest Nobel por la pêsc 2014 y conesciüda por so ativism por le dërt universal al 'istruziun y ala formaziun, por laurè fora na rapresentaziun teatrala sön chësta tematica che gnará presentada plü inant. Na secunda tlassa dla scora mesana da San Martin de Tor á dantadöt lauré sön le respet dl ater, na pröma tlassa dla scora mesana de Al Plan de Mareo á analisé a funz i conflic danter cumpagns svilupan scenes teatrales cörtes. „I proiec é gnüs a se le dé tratan ores de materies desvalies tles scores, á descedé l’interés di studënc y di scolars y s'à anuzé de plü lingac, danter le ladin, talian, todësch y inglesc, y tl lizeum ince le franzesc y le latin“, sotlignëia Castlunger.
rc
