Atualità
Pröma ediziun dl concurs a pesc “Auturs ladins scrì …”
OSP - L’Ofize cultura y scora ladina dla Provinzia Autonoma de Balsan-Südtirol lascia al savëi che al é gnü bandì la pröma ediziun dl concurs a pesc “Auturs ladins scrì …”. Tëmp por menè ite i laûrs cina ai 30 de dezëmber 2003.
Ara se trata de n pest por la realisaziun de operes che à da fà cun l’monn cultural ladin. Dötes les operes mëss ester scrites por ladin de Gherdëna o dla Val Badia, y n’ester mai gnüdes publicades. Les operes mëss suraprò ester scrites a na manira che ares ne adora degun intervënt al fin dla publicaziun. Dal concurs vëgnel stlüt fora tesi de laurea, traduziuns y copies de operes bele publicades te d’atri lingac.La bandida de chësc concurs é gnüda aprovada tla sentada dla Junta Provinziala da en lönesc passè sön proposta dl assessur ladin Florian Mussner. Tla medema sentada él inće gnü metü a desposiziuns i mesi finanziars por sostignì chësc concurs.
L’concurs prevëiga döes seziuns: leteratöra cuntada (romans, cunties) y essays (stüdi y inrescides te chisc ćiamps: architetöra, ert, archeologia, films, mujiga, teater, etnologia, sociologia y storia).
Al concurs po to pert persones singules o grups. Düć chi che tol pert mëss avëi cumplì i 18 agn.
Por vigne seziun vëgnel nominé 3 davagnadus. Chisc po pié do chisc pesć: pröm pest 2.500,00 Euro cun publicaziun y promoziun dl laûr, secundo pest 1.500,00 Euro cun publicaziun y promoziun dl laûr, terzo pest 1.000,00 Euro cun publicaziun y promoziun dl laûr.
Presidënta dla iuria che ejaminëia les operes é Brunamaria Dal Lago Veneri, scrituria, traduturia, antropologa, colaboradëssa de folieć da vigni dé y sföisc tl lingaz talian, todësch, ladin cun articui de antropologia, critica leterara y teatrala. I atri componënć dla iuria é: Edi Crazzolara da La Ila, Luis Mahlknecht da Urtijëi y Maria Cristina Senoner da S. Cristina.
I laûrs mëss gnì menà ite dan i 30 de dezëmber 2003.
Informaziuns plü avisa dà l’Ofize cultura y scora ladina al numer de telefonn 0471/26 70 28 o 0471/41 55 00. Les informaziuns po ince gnì desćiariades jö da internet dala plata: www.provinz.bz.it/intendenza-ladina o damanades por e-mail a: katharina.tasser@schule.suedtirol.it .
OSP
