Atualità
Euregio: Cooperaziun danter i rapresentanć dles scores
I rapresentanć scolastics dl’Euregio à sotescrit incö, lönesc ai 9 de merz, a Balsan na cooperaziun por l’adatamënt di sistems de valutaziun scolastica, l’ampliamënt dla rëi dl trasport publich y l’introduziun dla materia scolastica „formaziun politica“. Le documënt de colaboraziun prevëiga implü n’incuntada anuala danter düć i rapresentanć scolastics dl Euregio.
L’educaziun politica, la mobilité y i sistems de valutaziun conzeć dla colaboraziun é stà al zënter de n'incuntada danter i rapresentanć y les rapresentantes di scolars y dles scolares dl‘Euregio cun l’assessur por la scora ladina Florian Mussner y le rapresentant dles scolares y di scolars federal austriach Lukas Faymann incö, lönesc ai 09 de merz dl 2015, tl Consëi provinzial de Balsan. Tratan la sentada dl plenum à i rapresentanć y les rapresentantes di scolars dl’Euregio tratè na seria de ghiranzes coletives de düć trëi i raiuns. „La consultaziun danter la politica y l’aministraziun cun i consëis scolastics é dër importanta, inće por to dezijiuns che corespogn ales nezescitês atuales y reales di scolars y dles scolares“, insciö l’assessur ladin Florian Mussner, che à laldè l’impëgn da pert di rapresentanć scolastics. Mussner à inće sotrissé l’importanza dl plurilinguism tles istituziuns de formaziun tles valades ladines y le barat cultural danter i raiuns dl Euregio.
„Por renforzè la colaboraziun danter le provinzies él inće important da amplié la rëi dl sorvisc dl trasport publich di trëi raiuns, inće cun ofertes interregionales por studënć“, à sotligné incö tratan la conferënza stampa la presidënta dl Consëi scolastich ladina Milena Fallaha y le rapresentant scolastich dl Tirol por les SA Johannes Schretter .
Le presidënt dl Consëi scolastich talian Jacopo Dezulian y dl Consëi scolastich todësch Matthiasa von Wenzl à sotligné che le barat scolastich danter i raiuns dl’Euregio dess gnì amplié tres la na colaboraziun di raiuns dl’Euregio, implü él öna dles ghiranzes da unifiché tres de plü i sistems de valutaziun por alisiré le barat danter i scolars y les espriënzes ti raiuns vijins. Nicola Pifferi, suranstant dl Consëi scolatisch dl Trentin, à fat la proposta da istituì la materia de „formaziun politica“, che dess gnì insignada te dötes les scores dl’Euregio y che podess insciö aumentè l’interés tla politica y di conzeć de democrazia en general dles studëntes y di studënć. La rapresentanta scolastica dl Tirol por les SPMA Clara Köhler à recordè che chësta materia vëgn bele insignada tl Tirol.
Tl contest dl’Euregio él implü preodü inće tl dagnì vigni ann n’incuntada di rapresentanć scolastics de döta l’Euregio.
rc
Galaria dales fotografies
