Atualità
Por le dé mondial dl teater
OSP - En ocajiun dl dé mondial dl teater sotliniëia l’assessur ladin Florian Mussner l’importanza dl teater por pici y gran de düc i grups linguistics y de dötes les cultures.
Dlungia le liber, la musiga y l’ert pîta le teater la poscibilité de rové fora de n monn süt y cröde y de rové te n ater monn, chël dla fantasia. La creativité n’à de chësc vers nia limić. Bele i popui dan da plü co 2.000 agn se dê jö cun formes de rapresentaziun dla realté tres le teater. Le teater po’ nes portè te n ater monn, chël di sonns, dles fabules, dles stories reales o inventades, tres la vita de de gragn personajes.
Bele i mituns y les mitans da scora dess avëi la poscibilité de gnì confrontà cun chësta forma dl’êrt , cun chësc meso cultural, pedagogich y psicologich che dëida inće laurè sön la porsona, sön sües dificultês, emoziuns y agresciuns. An pò laurè impara inće por mioré les capacitês linguistiches y dl’espresciun en general sciöche l’articolaziun y la pronunzia.
L’assessur ala scora y cultura ladina sostëgn porchël düć i proieć dla scolina y dla scora che valorisëia chësc aspet.
Mo inće por i gragn pò le teater ester n meso d’espresciun y de confront por afrontè tematiches plü sotes dla porsona o inće por passè le tëmp lëde te na maniera plajora, aladô dles esigënzes. La pedagogia dl teater modern pîta tröpes formes d’espresciun.
Deplü grups de teater dles valades ladines é inće sön le tru da nen porvè fora de nöies, y chësc cun aprijamënt dl publich, scrî inant l’assessur.
Ligrëza i fej al assessur ladin le proiet che vëgn fat deboriada dal grup de teater de Sëlva adöm cun chël da La Val che portarà dant n toch deboriada en chësta aisciöda.
Al i fej a düć i grups de teater dles valades ladines cun düć chi che laora para dales manifestaziuns inant tröpa pasciun y ligrëza cun chësc hobby creatif che dëida svilupé capacitês importantes tla porsona.
OSP
