Atualità
Scora alta ladina: L'ASTAT à publiché i resultać di ejams de reparaziun
Da püch él gnü publichè dal Istitut de Statistica provinzial ASTAT i resultać di ejams de reparaziun dles scores altes. Indöt 3.036 studënć te döt Südtirol à messü dè jö un o plü ejams de reparaziun por podëi passè l'ann de scora. 66 é le numer complessif di studënć dles scores altes tles localitês ladines che s'à presentè ai ejams de reparaziun (de chisc à 56 studënć ciafè n arat positif).
I resultać di ejams de reparaziun dles scores altes reverda l’ann scolastich 2013/14, te chël che indöt 16.906 studënć é gnüs valutà tles scores altes te döt Südtirol (studënć dla pröma, secunda, terza y cuarta tlassa). De chisc 16.906 studënć à indöt 3.036 studënć (18,0 porcënt) messü se presentè tl mëis de setëmber a un o plü ejams de reparaziun por passè ala proscima tlassa. Le 21,6 porcënt di mituns valutà ala fin dl’ann scolastich 2013/14 à messü se presentè ai ejams de reparaziun, pro les mitans é la perzentuala plü basa (14,9 porcënt).
Por ći che reverda les scores altes tles valades ladines à 66 studënć messü dè jö un o plü ejams de reparaziun (le 15,8 porcënt de düć i 418 scolars valutà), tla scora todëscia à 1.712 studënć (14,8 porcënt) y tla scora taliana 1.258 studënć (25,6 porcënt) dè jö i ejams de reparaziun por podëi passè l’ann scolastich.
2.722 di 3.036 scolars (le 89,7 porcënt) che à dè jö i ejams de reparaziun à ciafè na valutaziun positiva, tles scores altes dles localitês ladines é 56 di 66 studënć passà (84,8 porcënt).
Le stüde cun düć i dać y les informaziuns plü avisa é gnü injuntè.
rc
