Atualità
eTwinning: Seminar europeich sön pratiches d’insegnamënt a Balsan
Metodes dla didatica de cooperaziun tres jomelinaji eletronics: de chësta tematica jararà dai 22 ai 24 d’otober a Balsan tl Sheraton Hotel olache al gnarà tignì n seminar europeich por insegnanć dla scora alta di raiuns transfronatliers de lingaz todësch en colaboraziun cun eTwinning Italia.
Dai 22 ai 24 d'otober vëgnel organisé a Balsan n seminar europeich sön le sistem de cooperaziun por insegnanć "eTwinning" che se basëia sön la cooperaziun danter scores y insegnanć tres jomelinaji eletronics cun le fin da modernisé les metodologies dla didatica tles scores altes.
eTwinning é n proiet nasciü tl 2005 y che fej pert dl program europeich Erasmus+. Sön la plataforma eTwinning s’âl ćina sëgn scrit ite presciapüch 255.000 insegnanć, 123.000 é les scores che à metü a jì 35.000 proieć de jomelaje te döta l’Europa. Düć i insegnanć scrić ite a eTwinning po colaborè tres mesi de comunicaziun nüs por mët a jì cooperaziuns europeiches de sperimentaziun y inovaziun dles pratiches d’insegnamënt tradizionales. Le sorvisc é debann.
Al tolarà pert al’incuntada danter l’ater 50 insegnanć scrić ite a eTwinning y che vëgn da paîsc y localitês da raiuns olache an baia todësch: dal’Austria, dala Germania, Slovenia, Lussemburgo, Talia, dal Trentin Südtirol sciöche inće dal Friuli-Venezia-Giulia.
La tematica zentrala dla scomenciadia sarà le plurilinguism – prinzip fondamental dl’Uniun Europeica – por promöie le valur y les oportunitês che se svilupëia tres la desfarënzia linguistica y por sostignì la colaboraziun danter les scores sura i confinns dles regiuns fora. L'Intendënt por la scora ladina Roland Verra tignarà te chësc contest n referat cun le titul "Mehrsprachigkeit in einem komplexen Bildungsumfeld".
Tres i seminars organisà gnaral pité la poscibilité da mët a jì proieć de colaboraziun tres la plataforma eTwinning, implü podarà i partezipanć to pert a ativitês d’inrescida che prevëiga la creaziun de proieć nüs.
L’incuntada de formaziun vëgn organisada dal Unité taliana eTwinning de INDIRE, cun le sostëgn di Referënć istituzionai eTwinning dles Intendënzes da Balsan y Trënt, dal’Ofize scolastich regional dl Friuli-Venezia-Giulia y dales Unitês nazionales eTwinning di Paîsc partezipanć.
Por plü informaziuns prëibel vijité les plates internet http://www.etwinning.net/.
rc
