Atualità
Ferata tla Galizia: 400 studënć, inće dala Val Badia, é sön le iade
Sön le iade tla Galizia é da incö, jöbia ai 16 d’otober 400 studënć da döta l’Euregio Südtirol-Tirol-Trentin por jì a recordè i avenimënć tragics dla Pröma vera mondiala y sües conseguënzes. Al tolarà pert al iade inće la cuinta tlassa dla scora alta dl ITE da La Ila. Le grup é gnü saludé incö söl Prener dai Presidënć Kompatscher y Platter y sarà sön le iade ćina ai 21 de otober.
Inće 12 studëntes y 9 studënć dla Vª tlassa dl Istitut Tecnich Economich da La Ila é pià incö jöbia, incër les 17.00 cun la ferata adöm a d’atri 400 studënć dl raiun dl’Euregio Südtirol-Tirol-Trentin por jì a descurì y interpreté i avenimënć che ê sozedüs dan da 100 agn tratan la Pröma vera mondiala tla Galizia, regiun danter la Polonia y l'Ucraina. „Le iade cun la ferata tla Galizia é n iade zoruch tl tëmp dla Pröma vera mondiala por imparè a conësce i avenimënć y les conseguënzes che conflić armà porta cun sé, implü él inće n'ocajiun por se confrontè sön chëstes tematiches cun plü studënć dl’Euregio y da interpretè la storia deboriada por capì l'importanza y la valüta di valurs dla pêsc y dla liberté“, à comentè l’assessur por la scora ladina Florian Mussner.
I studënć y les studëntes sarà sön le iade por cin dis por porvè da recordè y elaborè i avenimënć tragics dl tëmp dla Pröma vera mondiala danter le 1914 y ’18 tla Galizia, un di scenars di conflić olache inće tröć soldâs dl raiun dl’Euregio y dla Ladinia é tomà. Le secretêr general Matthias Fink à sotligné tratan la incuntada di partezipanć dl Südtirol che „les aspetatives danter i jogn é granes“. Incër 150 sarà indöt i studënć y les studëntes dl Südtirol che tolarà pert ala scomenciadia, al é cuartes y cuintes tlasses dles scores altes todësces, ladines y talianes. Les scores che é gnüdes chirides fora por to pert al iade é: la scora alta dl ITE da La Ila, les scores profescionales de lingaz todësch de Maran („Marie Curie“) y de Auer, la scora alta todëscia de Türesc, la scora alta taliana „Ghandi“ da Maran y l’Istitut Tecnich „Cesare Battisti“ da Balsan. I studënć vëgn acompagnà da insegnanć, storics y esperć interessà.
Le iade vëiga danfora deplü tapes, danter l’ater: na vijita ala cité de Krakòw, al ćiastel de Wawel, ala cité fortificada de Przemysl y ales cortines di soldas tomà tla Gran Vera a Brzesko y a Brylince. I storics Paolo Giacomel y Gertrud Margesin ti à recordè ai studënć tratan la incuntada che é gnüda tignida dantier tla Academia Cusanus a Porsenù che milesc y milesc de soldas de provegnënza dal Tirol, Südtirol y Trentin à pordü süa vita avisa te chëres zones. En sabeda ai 18 de otober él preodü sön la plaza prinzipala de Krakòw na „Festa de comemoraziun“ cun i trëi presidënć Arno Kompatscher, Günther Platter y Ugo Rossi, olache al gnarà inće lit dant por ladin da n studënt da La Ila n valgügn pinsiers fora de n diare de vera de n soldà de Fascia.
Le iade se stlüj jö ai 21 d’otober da doman, canche la ferata röia indô de revers sön le Prener.
Le program dl iade „Ferata tla Galizia – 100 agn Pröma vera mondiala“ po gnì desćiariè dala plata internet: www.euroregione.info/galizia.
rc
Galaria dales fotografies
