Atualità
Felix Ploner é le Diretur nü dl Ćiamp Inovaziun y Consulënza
Le Ćiamp Inovaziun y Consulënza à n Diretur nü: Felix Ploner à surantut da püch la direziun dl Ćiamp Inovaziun y Consulënza, na istituziun che se crüzia danter l’ater dl svilup pedagogich y didatich dl’insegnamënt tles scores ladines (p.e. cun publicaziuns nöies) y dl’aministraziun scolastica. Da püch él gnü tignì la pröma incuntada cun l'assessur por la scora ladina Florian Mussner.
Le Ćiamp Inovazion y Consulënza à dui de gran ćiamps de ativité: da öna na pert pol gnì odü sciöche n post de archirida, de atuaziun y de svilup por la scora, dal’atra pert sciöche post de sorvisc por la Junta provinziala, por l’aministraziun scolastica, por les scores y scolines y por düć i aturs dl monn dla scora. „Le ćiamp Inovazion y Consulënza à dandadöt fat en gran laûr tl ćiamp dla publicaziun di libri da scora y de ater material didatich por les scores y scolines ladines, ti dann gran pëis ala didatica integrada di lingać a na manira de se daidé öna cun l’atra“, à dit l’assessur por la scora y cultura ladina Florian Mussner tratan la pröma incuntada ofiziala de insediamënt dl diretur nü Felix Ploner. „An po dì che le ćiamp Inovazion y Consulënza fej inće le laûr da editur por i mesi didatics y ti augüri al diretur nü che al pois inće portè inant les inovaziuns y nüsc bi materiai ai atri grups linguistics “, à comenté l’assessur Mussner.
Dal 1 de otober 2014 à le dot. Felix Ploner surantut la direziun dl Ćiamp Inovazion y Consulënza. Ploner vîr a La Pli de Mareo y dô avëi insigné por apresciapüch 12 agn tles scores mesanes d’Al Plan y S. Martin, àl davagné le concurs tl’ann 2007 por n post de laûr tl Istitut Pedagogich Ladin. Te sò laûr s’âl dantadöt dè jö cun la formataziun grafica, i media nüs y le svilup de materiai didatics por les scores y scolines ladines. „Dantadöt l’inovaziun y le svilup tl ćiamp dla didatica sarà tl dagnì na cossa dër importanta por Inovazion y Consulënza“, à sotligné le diretur nü Ploner tratan l'incuntada y à ajuntè: „I Ladins n’à nia, sciöche i atri dui grups linguistics, n »Hinterland«, che po sostignì süa jënt, porchël messunse nos, adöm ai colaboradûs y les colaboradësses y ales insegnantes y ai insegnanć, laurè fora chisc materiai. Dantadöt inće l’azënt plurilingual de nosc sistem scolastich, pretënn na didatica y material d’insegnamënt aladô.“
Al ê l’ann 1987 canche al é gnü metü sö l’Istitut Pedagogich Ladin por dé sostëgn ales scores y a so laûr formatif y te sò svilup y adatamënt ai bojëgns de nüsc tëmps. L’Istitut â ciafè tres la lege la inćiaria da fà inrescides y valutaziuns sön la situaziun y i svilups tla scora, de porvè fora formes nöies d’insegnamënt y/o programs nüs tres sperimentaziuns, de pité a düć chi che laora te scora la poscibilité de s’ajornè regolarmënter tres cursc y grups de laûr, de mëte a disposiziun de chi che insëgna na ligna de mesi che dëida miorè l’insegnamënt.
Cun la lege provinziala Nr. 15 vom 23. Dezember 2010 é i istituć gnüs integrà cun dötes les funziuns da denant ti departimënć dla scora. L’Istitut Pedagogich Ladin é insciö gnü integrè tl Departimënt Educaziun y Cultura Ladina, y à spo ciafè l’inom »Inovaziun y Consulënza«. L’Istitut Pedagogich é gnü manajè te döta süa competënza dal dot. Theodor Rifesser ćina ala ponsiun l’ann 2011. Dailò incà à l’Intendënt dot. Roland Verra menè inant le laûr portan ite novitês y süa gran esperiënza.
Dötes les ativitês dl ćiamp Inovazion y Consulënza sarà da ciafé söl sit pedagogich.it
rc
