Atualità
Preparaziun PISA 2015: La scora ladina s'incunta ai 20 d'otober
91 scores te döt Südtirol cun indöt 2139 scolars (1036 mitans y 1103 mituns) à fat para tl 2012 al’inrescida PISA-OCSE. Por la scora paritetica dles valades ladines él preodü n’incuntada de formaziun por le stüde dl 2015 ai 20 d’otober dales 15 tl Istitut Tecnich Economich a Urtijëi.
Les zifres y i dać presentà tres l’inrescida PISA dl 2012 (che vëgn fata vigni trëi agn a livel internazional y vëgn metüda da jì dal OCSE: Organisaziun por la cooperaziun y le svilup economich) por les scores tl Südtirol é gnüs laurà fora y analisà dai ofizi competënć d’evaluaziun por podëi i inserì tl contest europeich y mondial de comparaziun. Alado dl raport él gnü constatè che i scolars dl Südtirol se posizionëia cun 506 punć por ći che reverda les conescënzes y capazitês tla matematica sura le valur mesan dl OCSE (494) y dla Talia (485). Les scores tles valades ladines à arjunt chilò le resultat plü alt tl Südtirol (523), dan i scolars dles scores todësces (513) y dles scores talianes (483).
Por ći che reverda les competënzes da savëi da lì à i scolars dl Südtirol inće arjunt n valur sura le valur mesan dl’OCSE (scores de Gherdëina y dla Val Badia 513 punć, scores todësces 503 y scores talianes 474 punć), i resultać tl ćiamp dles sciënzes naturales é te döt le Südtirol (519) inće sura le valur mesan dl’OCSE (501) y dla Talia (494). I scolars dles scores todësces à chilò arjunt le valur mesan de punć plü alt, 530, tles scores dles valades ladines él gnü registrè sciöche valur mesan 513 punć, tles scores talianes 483.
Por ći che reverda i resultać tles scores tles valades ladines él por Rosmarie Mussner dl Ofize por l’evaluaziun dl sistem de formaziun da tignì en conscidraziun döes cosses: „Da öna na pert le bun resultat dles scores altes dles valades ladines che tëgn le confrunt cun les scores todësces y talianes che confermëia le livel alt dl insegnamënt pité dai insegnanć.“ Dal altra pert él inće da osservè che i 77 scolars che à fat para ales proes PISA tres les scores altes dla Val Badia y Gherdëna rapresentëia le 30 porcënt di scolars ladins: „La maiù pert di scolars ladins se scrì ite tles scores altes todësces, impò él le resultat arjunt de gran valüta y importanza y confermëia la buna preparaziun che vëgn pitada tles scolines y scoles dles valades ladines.“
Por i insegnanć y por i direturs dantaldöt dles scores altes, mo inće dles atres scores y por les persones interessades ala scora paritetica ladina vëgnel pité n domisdé de formaziun ai 20 de otober, dales 15 tl Istitut Tecnich Economich a Urtijëi. Do na cörta ejaminaziun dl raport PISA 2012 tl Südtirol gnaràl presentè plü avisa n valgügn items cun ejëmpli per se arjigné ca ales proes PISA 2015 y por informè y istruì i presënć sön les prozedöres nöies. Les proes PISA dl 2015 gnarà fates por le pröm iade sön le computer, la priorité sarà chësc iade sön les competënzes scientifiches di studënć.
L’inrescida PISA-OCSE ejaminëia te n interval regolar de trëi agn les competënzes di scolares y scolars che à complì dai 15 agn y trëi mëisc ćina ai 16 agn y dui mëisc (tl 2012 düć chi che é nasciüs tl ann 1996) ti ćiamps dles sciënzes naturales, dla matematica, dl savëi da lì y dal 2012 inant inće tl ćiamp dl „problem solving – financial literacy“. L’obietif dl’inrescida é na comparaziun internazionala di standarg de savëi y d’educaziun di scolars y dles scolares dl’eté ejaminada. Le Südtirol fej para dal 2003. I Ofizi de evaluaziun dles trëi Repartiziun scolastiches fej n’evaluaziun statistica y comparativa di dać y dà fora na evaluaziun finala scrita di resultać.
rc
