Atualità

Scora / Cultura | 18.09.2014 | 16:03

Integraziun: Les incuntades por istituì na rëi de cooperaziun é piades ia

Por ti dè na sbürla al dialogh tl ćiamp dl integraziun à l’assessur provinzial Philipp Achammer metü a jì na seria d’incuntades por mët sö na rëi de colaboraziun danter Provinzia, Comuns y Comunitês Comprensoriales. Le fin é chël da realisè n’acordanza sön les chestiuns che reverda l’integraziun. La pröma incuntada é gnüda tignida cun i referënć por l’integraziun di Comuns tl raiun de Balsan.

Laurè adöm, s’incuntè y costruì n dialogh: chëstes les propostes por aumentè la colaboraziun danter la Provinzia, les Comunitês Comprensoriales y i Comuns por gestì adöm la politica dl’integraziun. L’assessur Achammer, che à l’inćiaria da se crüzié dl ćiamp dl'integraziun, à metü da jì na seria d’incuntades por mët sö na rëi danter i rapresentanć locai por i invié insciö à dè so contribut por la realisaziun de n plann plurienal che reverda l’integraziun. La pröma incuntada danter l’assessur Achammer y i referënć locai di Comuns da Balsan y dles vijinanzes é gnüda tignida da püch tl Palaz Widmann a Balsan. „Les premisses por che l’intergraziun garetes é la toleranza y le respet“, à dit Achammer che à injuntè che süa intenziun é chëra de renforzè la colaboraziun danter dötes les perts interessades realisan adöm n’acordanza sön l’integraziun „ sciöche n prozès de coordinamënt danter les assoziaziuns y organisaziuns cun le contribut de döta la popolaziun locala sciöche inće di zitadins nüs rovà laprò.“

Por Achammer é „la conescënza dl lingaz na premissa fondamentala por l’integraziun y na buna conescënza di lingać provinziai aumentëia la poscibilité da se sintì a ćiasa tl Südtirol, nia ma por les porsones imigrades tl Südtirol mo inće por les generaziuns che ti gnarà do“, à dit Achammer. Tratan l’incuntada à la direturia dl Departimënt Vera Nicolussi Leck presentè le sorvisc de coordinaziun por l’integraziun y à portè dant na pröma elaboraziun dl plann plurianual che gnarà realisé en colaboraziun cun les Comunitês Comprensoriales y i Comuns. Les tematiches prinzipales dl plann plurianual é: le lingaz, la familia, l’istruziun, la cultura, le laûr, la ćiasa, i comuns y les assoziaziuns. Al gnarà laurè fora te plü grups che é partis sö aladô di raiuns. La proscima incuntada é preodüda incö (jöbia) a Porsenù.   

 

rc

Galaria dales fotografies