Atualità
Scemplificaziun dl Ladin scrit dla Val Badia: pröma incuntada
I rapresentanć dl’Istitut Ladin Micura de Rü, dl’Intendënza ladina, dla scora y dles scolines dla Val Badia s’à incuntè cun l’assessur Florian Mussner por tratè te na pröma incuntada la scemplificaziun dl Ladin scrit dla Val Badia.
La scemplificaziun dl Ladin scrit dla Val Badia é stada tl zënter de na pröma incuntada de consultaziun tignida dan da püch da l’assessur por la scora ladina Florian Mussner cun rapresentanć dl monn dla scora y dl svilup dl lingaz.
Dl grup de laûr fejel pert rapresentanć dla scora ladina (l’intendënt Roland Verra, les ispeturies Rosmarie Crazzolara, Edith Ploner, la direturia Claudia Canins y le diretur Otto Moling), dl Istitut Ladin Micura de Rü (le diretur Leander Moroder y le presidënt Albert Videsott), dl’Université da Balsan (le professur Paul Videsott) y l’assessur Florian Mussner.
„Le fin dl’incuntada é chël da mëte les fondamëntes por na scemplificaziun dl ladin scrit adorè tla Val Badia y chësc cun le consens plü ampl danter les istituziuns che se crüzia dl svilup y dl’adoranza dl lingaz scrit“, insciö l’assessur Florian Mussner. Tla pröma incuntada él gnü tratè de plü chestiuns che podess portè a na scemplificaziun dl lingaz scrit. Le diretur dl Istitut Leander Moroder à portè dant na proposta concreta de scemplificaziun dl’ortografia, che é gnüda tuta sö bun dai atri mëmbri dl grup de laûr. „Chësta proposta é la pröma fondamënta por svilupé inant la discusciun sön la scemplificaziun dl lingaz scrit tles proscimes incuntades“, insciö l’assessur Mussner. Le diretur dl Istitut Ladin spliga che "les regoles nöies plü scëmples gnarà adotades te n tëmp de transiziun por ti dè la poscibilité a chi che scrî da les surantó y por ne delegitimé nia i tesć y i laûrs bele publicà." La proscima incuntada sarà ai 17 d'otober tl Istitut Ladin Micurà de Rü a San Martin.
rc
