Atualità
„Dé dla Scora Ladina“: Colaboraziun y proieć por le dagnì
La chirida do respostes ales sfidades dl monn dl’educaziun, la colaboraziun danter les istituziuns ladines y la scora ladina paritetica sciöche ejëmpl de na scora „europeica“: chisc é stà i punć de discusciun prinzipai dl Dé dla Scora Ladina incö, vëndres ai 5 de setëmber tla Ćiasa dla Cultura a La Ila.
Insegnantes y insegnanć, maestri y maestres dla scolina y dla scora elementara, mesana y alta dla Val Badia y de Gherdëina, l’assessur por la scora ladina Florian Mussner, l’intendënt Roland Verra, sciöche inće rapresentanć dla Univeristè da Balsan, dles uniuns ladines y di geniturs y ombolć s’à incunté incö, vëndres ai 5 de setëmber tla Ćiasa dla Cultura a La Ila por inaudé l’ann scolastich nü 2014/15 che mët man en lönesc ai 8 de setëmber.
Le scomenciamënt dl ann scolastich nü porta para de plü novitês y sfidades por la scora ladina ti proscimi agn: l’assessur Florian Mussner y l’intedënt Roland Verra à anuzé l’ocajiun dl'incuntada dl „Dé dla Scora Ladina“ por porté dant valgönes novitês y reflesciuns sön l’orientamënt dla scora ladina inće tl dagnì: „I insegnanć y i maestri devënta tres plü fondamentai te nosta sozietè nia ma por l’educaziun y la formaziun di mituns y dles mitans, mo inće y dandadöt por ći che reverda l’inserimënt y l’integraziun di jogn y dles jones te nosta sozietè, por so laûr y so gran impëgn por s'ajornè te na manira costanta messunse porchël i rengraziè“, insciö l’assessur Mussner che recorda, che cun l’introduziun dla scora paritetica y la valorisaziun di lingać à la scora ladina atuè bele dan da 60 agn n conzet de na scora „europeica“, che s’à desmostrè de gran valüta y che deventarà tres plü fondamental inće te n contest transfrontalier sciöche tl raiun dl’Euregio. Por miorè l’educaziun tles valades ladines él debojëgn, tres l’assessur Mussner, che dötes les istituziuns ladines d’educaziun laôres adöm te öna na direziun. „Amplié les ativites da d’isté por ti dè na man ales families cun trami i geniturs che laôra y aumentè le sostëgn y la colaboraziun cun la scora ladina d’Ampëz y Fodom é döes sfidades por le dagnì“, à stlüt jö l’assessur.
L’intendënt por la scora ladina Roland Verra à recordè re süa relaziun i bugn resultać formatifs di scolars dles scores ladines: „Chisc resultać é inće na sfidada por la scora ladina da mantignì le standard d’insegnamënt al medemo livel“, insciö Verra che à inće cumpedè sö les publicaziuns nöies tl ladin che é gnüdes realisades en colaboraziun cun l’Intendënza ladina: le cufer „Quaky“ che contëgn jüć y schedes didatiches por miorè la cosciënza di sonns di mituns y dles mitans dla scolina, le liber „Le planet che sona y ćianta“ che trata d’educaziun musicala y interculturala, i mesi didatics „Eli“, le sföi „Le Gran Bracun“, glossars desvalis d’educaziun storica por ladin, i libri por ladin „Laurun deboriada 1 y 2“ y le cd „Ćianties de dlijia“. Cun le referat „Educaziun ala democrazia: L’impëgn dles istituziuns educatives y formatives tla sozieté democratica“ de Dr. Kurt Edler da Hamburg é la pert ofiziala dl’indunada gnüda stlüta jö.
rc
Galaria dales fotografies
