Atualità
Storia di ladins dles Dolomites: presentaziun dl liber ai 13 de dezëmber
OSP - La storia di ladins dles Dolomites é tl zënter de na publicaziun nöia, che vëgn dada fora cun le sostëgn dla Provinzia dal Istitut ladin "Micurà de Rü". Le liber vëgn presentè en vëndres, ai 13 de dezëmber en presënza dl assessur provinzial Florian Mussner a Balsan.
I ladins dles Dolomites é öna dles dodesc mendranzes etniches reconesciüdes dala Talia. So raiun de insediamënt é tl cör dles Dolomites, te cin valades incër le Sela: la Val Badia, Gherdëna, Fascia, Fodom cun Col Santa Lizia y Ampëz. Döt le raiun tocâ laôta pro les la vedla contea dl Tirol.
Le liber nü de Werner Pescosta porta dant la storia de chësc raiun, dala preistoria ćina al dedaincö. Tl zënter él i avenimënć desvalis dl svilup politich, sozial, economich y cultural, che à formè la mendranza ladina, chël ô dì so lingaz, süa cultura, süa particolarité. Le liber se basa sön na inrescida de tröc agn olache al é gnü laurè sö material di archifs y dles biblioteches tignon cunt de conescënzes nöies.
L'autur dl liber Pescosta presentarà so liber ai 13 de dezëmber tl Palais Widmann a Balsan. Dala presentaziun dl liber saràl l'assessur provinzial Florian Mussner, le presidënt dl Istitut ladin „Micurà de Rü" Albert Videsott, le diretur dl Istitut ladin „Micurà de Rü" Leander Moroder, le professur Günther Pallaver y la professuria Ulrike Kindl.
I rapresentanć di media é dër bel invià
da tó pert ala presentaziun dl liber
en vëndres, ai 13 de dezëmber dl 2013, dales 11:00
tl salf de stampa, tl Palais Widmann
y da nen baié.
OSP
