Atualità
Assessur Mussner contënt di resultać PISA dla scora ladina
OSP - „Les scores ladines à stlüt jö dër bun pro le stüde PISA 2012 presentè dan da püch, dantadöt de cunc y por ci che reverda la competënza da lì“, s’la conforta l’assessur Florian Mussner.
Deperpo che al é gnü de cunć, le punt zentral de chësc stüde PISA, confermè i boniscimi resultać dl 2009 (523 punć), é i scolars ladins miorà cotan por ći che reverda la competënza da lì, da 488 a 513 punć. Tl ćiamp sciënzes naturales ài inće arjunt de bugn resultać, dassënn sura la mesaria dl OECD.
L'assessur Mussner ti ćiara cun sodesfaziun a chisc resultać positifs dles scores altes ladines. „I resultać é ćiamò mius ajache i scolars dles scores altes ladines à messü fà le test te n lingaz che ne n'é nia so lingaz dla uma", dij l'assessur provinzial.
„Al é vëi che le stüde PISA ne sciafia nia da tó ite döt le ćiamp dla formaziun tan complès, porimpò nen vara de n stüde ogetif a livel internazional, cun resultać importanć sön i standarg dla formaziun y i trends dla mediaziun dles competënzes", é sigü l'assessur Mussner. „Tl dagnì saràl important da laurè a na moda mirada devers dl renforzamënt de chëstes competënzes por tignì le bun livel y jì inant cun l'inovaziun", sotrissëia Mussner.
L'assessur provinzial Mussner ti à fat i complimënć ai scolars ladins, ai maestri y ai responsabli dla scora por chësc resultat, che sotrissëia do süa minunga la validité dl model dla scora paritetica plurilinguala. L'autonomia porta tres tröpes poscibilitês por miorè les scores y inće les competënzes di scolars, insciö Mussner.OSP
