Atualità
Storia dla leteratöra ladina: Presentaziun dl liber tla Teßmann
LPA - La Biblioteca Provinziala "Friedrich Teßmann" inviëia deboriada cun "Literatur Lana" y "Bozen-Bolzano University Press" ala presentaziun dla storia dla leteratöra ladina te trëi volums de Rut Bernardi y Paul Videsott.
Chësta storia dla leteratöra ladina nes dà por le pröm iade na vijiun generala sön 230 scrituries y scriturs dles cinch valades ladines dles Dolomites dal scomenciamënt dla leteratöra ladina (17ejimo secul) ćina a chëra contemporana. Ti articui che reverda les scrituries y i scriturs desvalis él da iade a iade na biografia completa, na lista de dötes sües operes y na discusciun dl'opera intiera tres na cerna le plü poscibl rapresentativa de tesć originai cun na traduziun todëscia laprò. Chësta opera standard nöia dla retoromanistica vëgn completada dai capitui d'introduziun sön le scomenciamënt y le svilup dla leteratöra ladina, sön les sorts de leteratöra desvalies y sü temesc, sön la storia dl'inrescida, sön le gnì dant dla leteratöra ladina ti media ladins, sön la presënza dla Ladinia tla leteratöra taliana y todëscia sciöche inće da n indesc de inoms final de prësc 3000 iscriziuns.
Le liber "Geschichte der ladinischen Literatur" de Rut Bernardi y Paul Videsott vëgn presentè en mertesc, ai 3 de dezëmber, dales 20.00 tla Biblioteca Provinziala Friedrich Teßmann, streda Armando Diaz 8, a Balsan.
usp
Galaria dales fotografies
