Atualità
Prejenteda la terza pert dla gramatica cumparativa per l tudësch, ladin y talian
LPA - L ciamp Inovazion y consulënza dl Departimënt educazion y cultura ladina à prejentà l terzo liber dla culana "Lingac n cunfront" sun la gramatica dl tudësch, ladin y talian; l liber sun la strutura dla frasa scëmpla ie unit prejentà tla facultà dla scienzes dl'educazion a Persenon.
L intendënt dla scoles ladines Roland Verra à auzà ora la mpurtanza de na gramatica cumparativa per la scola ladina, ulache la trëi rujenedes ladin, tudësch y talian vën adurvedes uni dì. L à rengrazià l'autora Heidi Siller Runggaldier y i autores Horst Sitta y Peter Gallmann per la bona culaborazion y per si gran mpëni. Revijion y consulënza per la frases ladines ti ejëmpli à inò dat Marco Forni y Giovanni Mischì dl Istitut Ladin "Micurà de Rü". I ejëmpli talians à cialà jù Francesca Santevecchi, culaburadëura per l talian al istitut de romanistica dl'università de Dispruch.
L autor Horst Sitta, professëur emerità dl'università de Turitg (Zürich) ti à dat pëis ala mpurtanza de na gramatica cumparativa per n bon nseniamënt dla rujenedes. A cuer ti stà a d'ël de formulé la strutures cumplesses dla rujeneda a na maniera che maestres y maestri pò la capì y nce les dé inant a mutans y mutons te scola. L autor Peter Gallmann, professëur de gramatica tudëscia al'università de Jena, à ilustrà cun l ejëmpl di pronoms tl tudësch, tan cumplicheda che la gramatica possa vester; ma l à nce dit che n ne daussà nia se desperé: iust l liber sun la frasa scëmpla stimulea a ti cialé ala gramatica de nosta rujeneda cun n "uedl fulestier", y chësc uedl fulestier juda a ntënder la strutures de nosta rujeneda, chëla strutures che nes semea tan natureles ne se ntendon nianca che les ie. Canche capion la strutura sota de nosta rujeneda, pudons nce la cunfrunté cun chëla de d'autra rujenedes y la mparé. L autora Heidi Siller Runggaldier, professëura de romanistica al'università de Dispruch, à mistrà su cun ejëmpli la regules dla pusizion dla paroles tla frasa. Chësta regules ie desvalives tla trëi rujenedes de nosta provinzia, y perchël iel de utl les cunfrunté per chi che mpera la rujenedes. Nscila pudons tla praticà schivé interferënzes.
Tla discussion cun l publich se mbinciova l'autora y i aiutores che l liber unissa adurvà da chëi che lëura cun mutans y mutons te nosta scoles. Tl daunì dëssel unì laurà ora nce material didatich y pità furmazion per i cuntenuc dl liber.
Ntant lëura l'autora y i autores bele sun l proscim liber dla culana "lingac n cunfront", dedicà ala frasa cumposta.
usp
