Atualità
Zënter bibliotecar nü: löm vërda da pert dla Provinzia y dl Comun
Al n’é plü nia che sta te tru ala realisaziun dl Zënter bibliotecar nü. Ai 23 d’otober à le Presidënt dla Provinzia Luis Durnwalder y l’ombolt da Balsan Luigi Spagnolli presentè le proiet cultural y sotescrit l’acordanza che regolamentëia i raporć de spersa y de proprieté danter la Provinzia y la Cité de Balsan. Śëgn pol gnì dè la conzesciun da frabiché y, sciöche al pê ćiamò chëst ann, déssel gnì scrit fora i laûrs de demoliziun di frabicać da śëgn.
De trëi sot a un n tët: le Zënter bibliotecar nü, che gnarà realisé dlungia la sënta atuala dla Biblioteca Tessmann, tl raiun danter les strades Diaz, Longon und Combattenti, tolarà ite les biblioteches provinziales "Friedrich Teßmann", "Claudia Augusta" y la biblioteca comunala "Cesare Battisti". Canche le proiet sarà rové, plü dessigü dl 2018, saràl a desposiziun presciapüch 1,1 miliuns de media. "Le Zënter bibliotecar dess deventè n post d’incuntada. Bele tl program de coaliziun unse fissé che i orun realisé n Zënter bibliotecar a Balsan deache chësc porta pro a s’incuntè y a sparagné cosć. Al ne mëss pö nia gnì fat sö trëi strotöres, al nen basta öna", à alzè fora le presidënt dla Provinzia Durnwalder en gaujiun dla conferënza stampa cun l’ombolt Spagnolli y i comëmbri dla junta provinziala y comunala.
Durnwalder à sotrissé che les biblioteches tl Südtirol, dantadöt tla periferia, é gnüdes potenziades indortöra, mo tla cité de Balsan él indere n bojëgn da recuperè deache les biblioteches comunales y chëres provinziales é jüdes sura sü lims de capazité fora. Les trëi biblioteches da śëgn restarà inant strotöres autonomes, mo da deforaia se mostraràres poscibilmënter cun n publich omogenn. I proietanć s’aspeta 400.000 vijitadus al ann che s’imprestarà fora prescipüch 600.000 media.
Por la realisaziun dl Zënter bibliotecar êl gnü scrit fora n concurs internazional, stlüt jö dl 2006, y davagné dal architët da Balsan Christoph Mayr Fingerle. Dedô é le proiet ćiamò n iade gnü laurè fora por ćiarè da mantignì l’entrada prinzipala, la falzada y la stiga prinzipala dla scora Pascoli. Inier à Mayr Fingerle presentè plü avisa so proiet cun cater alzades sura tera y trëi sot tera.
Pro la conferënza à l’assessur por i laûrs publics splighé che ara se trata de na strotöra de 118.000 metri cubics y de n cost de 67 miliuns de euro, mo che süa importanza va bëgn sura sü mürs fora: "Le Zënter bibliotecar dess daidé desfà i mürs ti ćes y dess deventè n post d’incuntada por düć trëi i grups linguistics. Al é le plü bel messaje cultural dè dala Junta provinziala tratan chësta legislatöra." L’assessur provinzial por la cultura taliana à alzé fora che le Zënter é n proiet cultural da podëi mostrè inće en previjiun dla candidatöra a Capitala europeica dla cultura dl 2019.
Ala fin dla conferënza stampa à le presidënt dla Provinzia Durnwalder y l’ombolt Spagnolli sotescrit n’acordanza patrimoniala danter le Comun sciöche patrun dl grunt y la Provinzia sciöche patrun dl frabicat. Le Comun ti zed ala Provinzia n dërt de suraspersa ćina che le bëgn imobil vëgn adorè sciöche biblioteca. Do che la costruziun é gnüda stlüta jö ciafarà le Comun n dërt de nuzaziun registré tl liber fondiar sön la parzela de suraspersa nöia olache al é n terzo de döta la cubatöra dl imobil. La Provinzia realisarà döt le frabicat y surantolarà i cosć dala proietaziun ćina ala realisaziun dl frabicat.
Cun la sotescriziun dl’acordanza pol śëgn gnì dè la conzesciun da frabiché. Chësta é la condiziun por podëi scrì fora i laûrs de demoliziun di frabicać che mëss gnì trać jö. La Provinzia mina che l’indiziun vëgnes bele inviada ia ćina la fin dl ann. (USP)
usp
Galaria dales fotografies
