Atualità
“Uncutted” gëura ai 14 de setëmber a Urtijëi
La lingia de mostres da instà tl Istitut Ladin ruva n sada ai 14 de setëmber a si finela cun na nuvità. La cuinta mostra ne sarà nia da udëi a San Martin, ma a Urtijëi. La giaurida dla mostra “Uncutted” de Barbara Tavella ie l resultat de na culaburazion cun la Lia Mostra d’Ert.
Pra la giaurida dla mostra de pitures puderan audì la curadëura Katharina Moling y sonn de Stefano Bernardi. Barbara Tavella, 1972, à studià pitura tl’Academia d’ert Brera a Milan. Da plu ani se dà l’artista da La Val ju cun la pitura te na maniera sperimentela. Chësc n cont dla pitura nstëssa, ma nce n cont dl motifs. Truepa de si pitures mostra l motif dla figura feminila, ma velch nce chël de tieres.
La giaurida dla mostra “Uncutted” de Barbara Tavella scumëncia n sada, 14 de setëmber, dala 20:30 tla sënta dla Lia Mostra d’Ert a Urtijëi.
La Mostra "Uncutted" sarà da udëi nchin ai 29 de setëmber, dal merdi ala sada dala 10 ala 12 y dala 16.30 ala 19.00 tla sala dla mostres dla Lia Mostra d'Ert, sun plaza S. Antone a Urtijëi. De dumënia sarà la mostra me danmesdì davierta. (USP)
as
