Atualità
Mussner lauda cores y urchestra de Gherdëina per si cunzerc straurdineres
Ntan la lingia de cunzerc Valgardena-Musika à feter 300 ciantarins y strumentisć de Gherdëina purtà dant doi cunzerc cun opres musicheles de marueia. L assessëur ladin Florian Mussner sorissea la scumenciadiva straurdinera dl urchestra Sonoton deberieda cun i cores dla valeda, metan a cuer l valor dl livel musichel y l spirt de culaburazion. I doi cunzerc à trat adalerch passa 2000 ascutadëures.
Per la cumenanza de Gherdëina ie i cunzerc di cores deberieda cun l'urchestra Sonoton, ai 28 y 29 de agost tl zënter da Tennis a Runcadic stat n gran avenimënt culturel. L Assessëur ladin Florian Mussner ti sënt gra a duc chëi che à fat pea, dajan ca truep tëmp liede, dai ciantarins ai strumentisć, dal dirighënt ai solisć y a duc chëi che à sëurantëut l rie lëur dla urganisazion. "L me à fat gran legrëza pudëi cunstaté che l livel de cualità dl cianté y dl suné crësc da ann a ann. N cëla for plu y plu de lauré adum danter i truep cores de Gherdëina y chësc ie de gran valor per nosta cumenanza", nsci Mussner, metan a cuer che chësta bona culaburazion porta nia me a n resultat musichel de marueia ma nce a na gran sensibeltà da pert de duta la populazion.
Sota l titul "La mujiga lieia adum" iel unì purtà dant doi opres dedichedes al tema dla pesc. La prima ie n'opra che à abù te chisc ultims ani n gran suzes; l ie n'opra dl cumponist canadesc Karl Jenkins dal titul „The Armed Man: A Mass for Peace". L ie n'opra che se dà ju cun la tematica dla viera y dla pesc, cun l ordinarium dla mëssa y cun pec danter ite che fej medité sun l ciuldì dl bujën dla pesc. Dlongia l cor y l urchestra iel mo trëi solisć che fej pert dl urganich: l Muezzin (Sami Hamdi), na sopranista (Brigitte Canins) y na usc de n mut (Sebastian Ploner de 10 ani).
La segonda ie n'opra dl dirighënt nstess - Mathäus Crepaz - sun paroles de Ivan Senoner, che trata ënghe l tema dla pesc. L cumponist à sapù da nterpreté drët bën musicalmënter la paroles dl scritëur. L pez fina via cun paroles plëines de speranza, che nes dij che te uniun de nëus iel unì sentà n lën dla pesc, che la va de cultivé y de blandé, pona cresceral y dajerà de bon fruc.
Do n gran aplaus oven, sciche bis, njinià ca n pez che passenova mo drët bën dal titul „Baba yetu" dl cumponist Christopher Tin. Chësc pez lecorda mpue l cianté di cores africans y à leprò n bel Sopran-solo (Ingrid Demetz). I ideatëures y promotëures de chësc gran avenimënt culturel ie stai Filip Piccolruaz, Erwin Moroder y Martin Runggaldier. (USP)
as
Galaria dales fotografies
