Atualità
Uneranzes per maduranc de suzes cun reprejentanza ladina
Te dut Sudtirol ie chëst ann 111 sculeies passei l ejam de matura cun la miëura votazion de 100 ponc. (NCUEI) Ai 30 de agost ie chisc jëuni unic unerei dal presidënt dla Provinzia Durnwalder deberieda cun i trëi assessëures ala scola Mussner, Kasslatter Mur y Tommasini tl palaz Mercantil a Bulsan. Aldò di cumëmbri dla Jonta provinziela dëssa la prestazions straurdineres unì uneredes ajache les pieta de bona pusciblteies per muever tla proscima fasa de vita.
Di 3600 jëuni che ie chëst ann passei l ejam de matura, nen fovel 111 da cënt ponc: 67 tla scoles tudësces, 31 tla talianes, doi la tudësces y 11 l conservatorio de mujiga. Pra la scoles ladines se tratel de Nicola Giorgi dl Istitut Raetia y Gabriela Rungger dl Lizeum d'ert Cademia a Urtijëi. Di luesc ladins iel nce unì unerà Julian Dapunt de Badia (Sprachen- und Realgymnasium Bruneck „Nikolaus Cusanus"), Andrea Meraner de Sëlva (Liceo Scientifico Tecnologico "Galilei"), Anita Obwegs de Al Plan (Sozialwissenschaftliches Gymnasium und Kunstgymnasium Bruneck), Alex Walpoth de Urtijëi (Realgymnasium und technologische Fachoberschule Meran) y Luianta Verra (Sozialwissenschaftliches Gymnasium Brixen „Josef Gasser").
"l nes fej plajëi che i jëuni, che aministrerà nosc ncësa tl daunì, ebe na bona preparazion" à dit l presidënt dla Provinzia Durnwalder te si rujeneda. I jëuni, nsci l presidënt, à n bon cë y à laurà cun lezitënza, ma la n ne dëssa nia desmincë duc chëi che à judà pea a arjonjer chisc resultac. Durnwalder à fat referimënt ala families, i nsenianc y l'aministrazion de scola. "La scola y de bon sculeies ie daniëura la fundamënta acioche la cumenanza y l'economia posse jì bën".
"L ie drët sorissé i resultac de marueia" à dit l assessëur ala scola ladina Florian Mussner nvian i jëuni a se mëter obietives auc y de ti jì permez ala vita cun flessibltà y dinamica". Da pert dla politica, nsci Mussner, se mpënien a ti pité ai jëuni de bona cundizions per l daunì.
L presidënt Durnwalder cun i trëi assessëures ala scola Kasslatter Mur, Mussner y Tommasini ti à fat i auguresc ai maduranc de suzes ti scincan n aparat per liejer libri digitei e-books. (USP)
as
Galaria dales fotografies
