Atualità
23 auril, di mundiel dl liber: publicazions ladines tla Rë zivica (cun audio)
Tla Rë zivica iel unì giaurì na sezion nueva dla publicazions ladines per sustenì la cura dla rujeneda ladina da pert dla Provinzia de Bulsan. “L suzes di doi libri dl ultimo cuncors de leteratura demostra che la populazion à gran nteres per publicazions ladines” sorissea l assessëur provinziel ladin Mussner n ucajion dl di mundiel dl liber ai 23 de auril.
Cun la stories per jëuni che fova unides mandedes ite per l cuncors provinziel de leteratura "Autores ladins scrij" iel unì dat ora doi libri: un cun sies stories per jëuni y l'auter cun n romann criminel. Dl liber "Auturs ladins scrî 2012" ie unì stampà 1200 copies y 900 ie bele unides dates ora. Dl romann "L fova n iede te Gherdëina" ie unì fat 1000 copies y de chëstes ne n iel unì dat ora 650. "Sce te puec mënsc iel bele unì dat ora doi terzi dla copies dl romann criminel y trëi cherc di libri cun de plu stories, ie chësc n sëni de gran nteres a liejer tla rujeneda ladina" se ncunforta l assessëur Florian Mussner.
Per mantenì y fé viver na rujeneda de mendranza muessela nce unì adurveda tl ciamp dla leteratura. "L cuncors de leteratura cun la publicazion de doi libri ie propi unì metù a jì per dé n mpuls ala cura dla rujeneda ladina nce sun l livel dla leteratura" spiega l diretëur de repartizion Alexander Prinoth. La terza edizion dl cuncors provinziel de leteratura ladina ne à nia me abù suzes cun la publicazions: "Cun 53 autores che à mandà ite stories per jëuni ie unì arjont n record nuef" spiega Barbara Perathoner dl Ufize Cultura ladina.
Da pert dla Ntendënza ladina uniral chëst ann dat ora l terzo liber dedicà ala gramatica trilinguala laurà ora cun l sustëni de prufessëures universiteres.
N ucajion dl di mundiel dl liber pieta la Provinzia de Bulsan na ucajion nueva per ti ruvé permez plu saurì a si publicazions tla rujeneda ladina. Tla Rë zivica, l portal de nfurmazion dla Provinzia, iel tla verscion ladina unì giaurì na sezion dedicheda ala publicazions. Prejentedes tl orden alfabetich possen tlo abiné belau 80 publicazions ladines dates ora dala Repartizion Cultura ladina, la Ntendënza ladina y l Ufize stampa provinziel. "Te tëmps dl internet aslune ons ulù pité bona pert dla publicazions ladines nce tla forma digitela da pudëi desćiarië ju y nsci da abiné plù saurì y plu riesc" spiega l assessëur Florian Mussner. La sezion dla publicazions ladines ie da abiné sun www.provinzia.bz.it al pont de menù "publicaziuns". (USP)
Tlica tlo per ruvé tla sezion dla publicazions ladines dla Rë zivica
www.provinzia.bz.it/la/publicaziuns/publicaziuns.asp
as
Galaria dales fotografies
Mussner: cuncors leteratura - publicazions ladines tla Rë Zivica
- Scarica il file audio 677 kb
