Atualità
1500 prupostes de paroles ladines nueves te n ann (cun audio)
Acioche la rujeneda ladina possa tenì l var di tëmps y se svilupé inant, lëura na grupa de esperc da n ann sun paroles nueves. La soluzions per esprescions nueves se adrova tëmp per madurì y la bona ulentà. “Paroles nueves che vede bën nce per la valeda ujina ie de gran valor ajache les ie sciche ziedli per fé su na fundamënta per miëur cuntac danter la valedes ladines” sorissea l assessëur ladin Mussner.
Diesc esperc dl Istitut Culturel Ladin "Micurà de Rü" y dl Ufize provinziel per cuestions linguistiches se à ntan l ultimo ann for inò ancuntà per abiné soluzions a esprescions nueves che va de bujën tla rujeneda ladina. Dlongia la gramatica y l'ortografia cëlen spzificamënter per i neologisms (paroles nueves) de abiné na soluzion che posse jì bën nia me per una valeda sëula. "La rujeneda dl oma sentions sciche nosta rujeneda persunela, perchël adurvons tëmp assé per tò su paroles nueves" dij l assessëur Florian Mussner. Do chësc moto lëura nce la grupa de esperc: te na banca datesc iel nchinamò unì tëut su feter 1500 paroles ladines nueves paredledes ala dizion tudëscia y taliana. L se trata de prupostes che vën metudes a descuscion cun l fin de madurì y de pudëi pona unì tëutes su ti dizioneres y giapé a chësta maniera n carater ufiziel. "Te chësc lëur cëla la grupa de esperc che la prupostes per paroles nueves posse jì bën nce sëura una na valeda ora" spiega Leander Moroder, diretëur dl Isititut Ladin.
Pernan che n rata che l sistem de lëur sibe madur y purvà ora sciche toca, à l Istitut la ntenzion de tré ite nce la istituzions ladines dl'autra valedes. "Per pudëi fé vares inant tl svilup dla rujeneda ladina, ne possa i esperc nia fé dut da sëui, l va nce de bujën dla bona ulentà y cooperazion da pert d'autri. Pënsi tlo dantaprima a chiche lëura te d'autra istituzions ladines y ti media ladins" spiega l assessëur ladin Mussner.
La grupa de esperc per cuestions linguistiches ova l ann passà d'ansciuda nvià via si atività tl cheder dl lëur per scemplifiché la gramatica y l'ortografia dl ladin. (USP)
as
Galaria dales fotografies
Mussner n cont dl svilup de paroles ladines nueves
- Scarica il file audio 540 kb
