Atualità
14 de merz: portes daviertes tl Istitut tecnich economich a Urtijëi
USP – Sculeies y genitores che muessa chëst ann mo crì ora na scola auta per l autonn, giapa ai 14 de merz la puscibltà de vijité l Istitut tecnich economich Raetia de Urtijëi. Danmesdì uniral pità vijites menedes, domesdì puderan mparé a cunëscer la lezions y da sëira ie i genitores nviei a na prejentazion di programs.
Acioche sculeies y genitores posse nstës se fé na mprescion de co che l ie a jì a scola tl Istitut tecnich economich a Urtijëi, vëniel ntan la di dla prota davierta pità vijites menedes. Dala nuef, dala diesc y da mesa la dodesc de n juebia ai 14 de merz uniran cumpaniei tres l frabicat nuef per udëi la tlasses, la tlasses spezieles y duta la njinies che vën adruverdes tl nseniamënt.
Per purvé ora coche la fossa propi a fé chësta scola vëniel domesdì dat la puscibltà de se senté ite tla tlasses y fé pea vel lezion speziela per mparé a cunëscer l nseniamënt de scola. Per chësta lezions spezieles iel de bujën de se nuté su danora tla direzion de scola (tel. 0471 796296 o itc.urtijei@schule.suedtirol.it).
Dala 20.00 uniral prejentà i programs de scola ai genitores ulache n vën pona nce dat ucajion de damandé do nfurmazion te n cuntat persunel.
L Istitut tecnich economich Raetia pieta de plu pusciblteies: la sezion‘IGEA che da plu pëis al'economia aziendela y la sezion turistica cun rujenedes. Te chësta segonda sezion vëniel nce pità n program spezifich per sculeies che fej sport agonistich. La carateristica prinzipeiela che desferenzieia l Istitut Tecnich de Urtijëi da chëi tla ziteies ie l sistem scolastich paritetich che pieta l nseniamënt de plu rujenedes a n bon livel.
De plu nfurmazion sun l Istitut Tecnich de Urtijëi ie nce da giapé sun la plata www.iteraetia.it tl internet.
as
Galaria dales fotografies
