Atualità
Scumencià la scultures de dlacia a Urtijëi
USP – Tl raion da jì a pe de Urtijëi iel (NCUEI) ai 14 de jené unì metù man de fé scultures de dlacia. Sculeies dl Lizeum d’ert cun Scola prufesciunela de Urtijëi lëura deberieda cun si maestri nchin a n vënderdi de chëst’ena per n cuncors metù a jì n culaburazion cun la Lia turistica y l Chemun de Urtijëi. La scultures de dlacia vën chëst ann fates do modiei de bozes.
Ziplé tla dlacia y chël mo ntan che l publich cëla pro ie na sperienza particulera che l Lizeum d'ert cun Scola prufesciunela de Urtijëi ti pieta nce chëst ann a si sculeies. 13 jëuni y jëunes possa chëst'ena fé lezion pratica ala lergia y nstës lauré pea a trasfurmé tapli de dlacia te scultures. I sculeies ie mpartì te cin grupes che fajerà scultures de bozes. Nfati vëniel chëst ann fat do l model de bozes de vin, snops o nce de profem.
I sculeies dla scola prufesciunela unirà cumpaniei dai nsenianc Andreas Tomasini y Norbert Insam. Franziska Rainalter y Loic De Lesmadec fajerà na scultura de na boza de Chianti. Felix Vougny y Marija Markovic se à tëut dant de fé na boza a de Vecchia Romagna de dlacia, ntan che David Harding y Francesco Sacchi à cris ora na carafa dal'ega. A na boza dal profem à pensà Sophie Eymond y Sanoll Matthias che fajerà na scultura de na boza de Chanel. La grupa dl Lizeum d'ert à cris ora l model de na boza de Weingeist. I sculeies Valentin Alber, Mattia Demetz, Thomas Delazer, Luca Visciani y Elisabeth Prünster unirà sustenii dal maester Markus Delago.
La cin scultures de dlacia messerà unì finedes nchin a n vënderdi, 18 de jené ajache per la cinch domesdì iel udù dant la premiazion dl cuncors sun la pitla plaza S. Antone.
---
De plu fotos sun la plata facebook "Jonta proviniziela"
---
Lizeum d'Ert y la Scola Prufesciunela per l artejanat artistich "Cademia" tl web sot a www.cademia.it
as
