Atualità
La storia dl film: prima unità didatica de ladin per la scoles autes
USP – Per l prim iede vën l nseniamënt dla rujeneda ladina tla scoles autes sustenì cun na unità didatica. L servisc provinziel de Inovazion y Consulënza per la scoles ladines à dat ora materiai de nseniamënt sun la storia dl film. A chësta maniera iel unì arjont doi obietives: pité cuntenuc modernes che nteressea i sculeies y se nuzé dla rujeneda dl’oma tl nseniamënt de scola auta.
La unità de lëur „Storia dl film“ ie unida laureda ora dal nseniant de ladin y scritëur Ivan Senoner. Ël ti ie jit do ala storia dl film dal 1910 inant nchina aldidancuei, mustran su ejëmpli nteressanc de produzions cunesciudes sëura dut l mond y prejentan nce l cuntenut de films che à fat storia, cun si persunajes plu mpurtanc y cun i atëures y regissëures plu cunesciui. Chësc mesun de nseniamënt ie unì dat ora tla verscions per gherdëina y badiot.
La grafica y l layout ie de Anita Demetz, la fotografies ie unides crisses ora da Felix Ploner, l test badiot ie unì ciancià da Claudia Rubatscher y l letorat ie unì fat da Rosmarie Mussner y da Erna Flöss che à nce coordinà l proiet.
La publicazion che cuntën nce eserzitazions y dumandes plu avisa ie unida stampeda dala stamparia dla Provinzia Autonoma de Bulsan.
„N spera de pudëi ti dé tla mans a nosc nsenianc de ladin n mesun che toca l nteres de nosc jëuni y che atualisea l nseniamënt dl ladin, desmustran che l ne n’ie nia mé tacà ala cultura dl passà“ dij l Ntendënt Roland Verra.
--
Plates web dl servisc de Inovazion y Consulënza dl Departimënt Educazion y Cultura Ladina (www.pedagogich.it)
usp
