Atualità
Cunvëgn: "I ladins, na mendranza tla mendranza"
OSP - In vëindres, ai 22 de nuvëmber, dales 9 daduman ales 17 dômisdé tl salf dl Cunsëi dla Regiun Trentin-Südtirol, tl Palaz provinzial, tla strada Crispi 6 a Balsan.
Le Cunsëi dla Regiun Trentin-Südtirol mët a jí deboriada cun l'Assessorat por la scola y la cultura ladina le cuvëgn "I ladins, na mendranza tla mendranza".Le program por chësc vëindres vëiga danfora naota deplö parores de salüt y reflesciun da pert dl presidënt dl Cunsëi regional Franz Pahl, dl presidënt dla Junta provinziala Luis Durnwalder, dl assessur ladin Florian Mussner, di vizepresidënt dla Regiun Carlo Willeit, dl presidënt dl Istitut Ladin "Micurà de Rü" Hugo Valentin, dl vizepresidënt dl Istitut europeich dl Université de Turic Anton Killias y infin dl professur universitar y diretur dl CIFEM Albert F. Reiterer.
Inant jarala spo cun le referat: "L ladin dal punt d'odüda linguistich", de Lois Craffonara.
L'avocat Christoph Perathoner fajarà deplö cunscideraziuns storiches, politologiches y iuridiches sön la "Defendura dla mendranza ladina te Südtirol", deperpo che l'avocat Roland Riz analisarà la "Cuestiun ladina tl dërt costituzional".
Le deputat y avocat Beppe Detomas jarà ite sön la "Scunanza dla mendranza ladina tl Trentin y tl Venet".
"Les fundamëntes dl dërt linguistich dla Svizra tignon cunt dl retoroman", sarà le referat dil professur universitar Daniel Thürer.
Cô che ala sta tla pratica politica gnarà splighé dal deputat tla Ciamena Siegfried Brugger cun le referat: "La scunanza dles mendranzes dal punt de odüda dl Parlamënt talian".
Dô la pausa de misdé sarál dales 15 le professur universitar Peter Hilpold che baiarà sura "La scunanza tres le dërt internazional".
Le professur Paolo Carrozza spligarà spo la situaziun dles "Mendranzes stersces y de chëles debles tl ordinamënt iuridich talian" dan stlü jö cun Theo Rifesser che jarà ite tla situaziun dla "Scola ladina te Südtirol".
Incër les 17 él söl program ciamò na cürta descusciun y analisa finala dl dé.
EB
