Atualità
Publicà l romann criminel ladin “L fova n iede te Gherdëina”
USP - Pra l cuncors provinziel de leteratura à l romann de Ivan Senoner tucà tan dassënn la cumiscion che l ie unì premià cun la publicazion. Ai 19 de dezëmber ie l liber nuef scrit per gherdëina unì prejentà ntan na sëira de leteratura a Urtijëi.
La terza edizion dl cuncors “Autores ladins scrij” ova damandà stories per jëuni che trata de curaje zevil, dl daunì o dla lidëza. Te si romann criminel scrij Ivan Senoner de Fudlé na saga de cater families tres trëi generazions. L liber nuef trata de n jëunn che sbriscia ite tla storia de si antenac che ne fova nia cis rëidla. L roman tlopa su la tematica dl’opzion, l boom economich di ani ’70, l bënsté di ani ’90 y la melsegurëza dl milené nuef, y se svilupea pona te na storia criminela plëina de misteres.
L ie na storia penseda per jëuni che fej pensé do sun l vester na bona persona y na persona rëidla, sun la nfluenza di antenac y de cie che uni un fej nstës. L roman conta che l curaje zevil ne n’ie nia n merit, ma dantaldut na respunsabltà ruënta che ie suënz nia saurida da tò tla mans.
Alexander Prinoth, diretëur dla repartizion cultura ladina à te si ntroduzion ala sëira sorissà l valor leterer dl romann y si fazion acioche nosta rujeneda vënie adurveda de plu tla leteratura. La valutazion leterera dl romann ie unida fata da na cumiscion metuda adum da Marco Forni, Roberta Dapunt, Isabella Ties, Claus Vittur y Gretl Senoner. “Ivan Senoner à fat na scincunda a uni un che uel liejer chësc liber, ajache l possa se lascé ite tl romann y se liejer ora si romann persunel” à dit l presidënt dla cumiscion Marco Forni dan na sala plëina de nteressei.
Da pert dla Provinzia de Bulsan iel unì metù a jì l cuncors cun publicazion dl liber per sustenì n bujën particuler dla mendranza. Cun chësta scumenciadiva an ulù dé na sburdla acioche l vënie scrit pec de leteratura per ladin. Chëst iede ons ulù mëter l azënt sun stories dedichedes a jëuni, che possa nteressé letëures de uni età. “Tenian cont che te na mendranza ne à la leteratura nia na gran tlientela, ons dat ora chësc liber da pert dla Provinzia” spiega l assessëur Florian Mussner.
L autor dl liber se à tla sëira de prejentazion mbincià che si pez posse nce mustré su la situazion di jëuni te Gherdëina, “che ie datrai nce n pue’ te na gabia d’or”. Ivan Senoner à pensà chësta storia per duc chiche se sënt jëuni: “ciuldì ne dëssen pa nia pudëi liejer n liber per gherdëina nce sun spiagia”.
La sëira de leteratura dl zënter per jëuni a Urtijëi ie unida cumpanieda al tlavier da Judith Piccolruaz. Petra Polli, che ova l venciù l cuncors de grafica per l cuiertl de chësc liber, à prejentà si nzijion de ram che cuer l liber nuef da dedora.
L liber “L fova n iede te Gherdëina” unirà spartì ora tla scoles y tla biblioteches. Nteressi l giapa nce tl Ufize Cultura ladina, streda Binder 29, a Bulsan (e-mail a Barbara.Perathoner@provinzia.bz.it). L liber nuef ie debant.
La publicazion dl romann criminel stluj ju la terza edizion dl cuncors provinziel de leteratura ladina. D’ansciuda fovel unì premià Tobia Moroder, Ruth Videsott y Julia Runggaldier. Si stories per jëuni ie unides publichedes deberieda cun mo trëi d’autres tl liber “Auturs ladins scrì” che ie ënghe da giapé tl Ufize provinziel per la Cultura Ladina a Bulsan. (cëla: N liber nuef de stories per jëuni)
De plu fotos sun la plata facebook "Jonta proviniziela"
as
Galaria dales fotografies
