Atualità
Nfurmazion sun scoles y mestieres tla fiera Futurum dai 4 ai 6 de utober
USP – La dezijion de ciuna furmazion do la scola mesana y la pruspetives de giapé da lëur se damanda na bona basa de nfurmazion. Da n juebia nchin n sada, dai 4 ai 6 de utober giata i jëuni y i genitores duta la nfurmazion prejënteda tla fiera dla furmazion Futurum a Bulsan.
La furmazion ie l'elemënt zentrel per l svilup dla persona. Per chësta rejon iel per i jëuni mpurtant se de ju y se nfurmé per tëmp dan crì ora la streda de furmazion che i uel tò. La fiera Futurum a Bulsan pieta cater ciamps de nfurmazion: la scoles autes se prejënta sun ijules tematiches, nfurmazion uniral nce pità da pert dl'Università, dla scoles de spezialisazion tl raion dl'Euregio y leprò mo da universiteies da oradecà sciche chëla per l'economia "Bocconi" de Milan y chëla de Padova. I autri doi ciamps dla fiera reverda i cursc de furmazion y la cunsulënza. La scoles autes di luesc ladins se prejenterà tla ijules tematiches dl'economia, dla linguistica y dl'ert.
La nfurmazion unirà data de prima man dai culaburadëures, prufessëures y nce da studënc. L mont dl lëur vën tla fiera Futurum reprejentà dal ufize provinziel per i lerneri y la repartizion per l lëur. Tema zentrel de chisc stonc sarà la furmazion di lerneri che ie unida refurmeda.
La fiera Futurum, nvieda via dai assessëures ala furmazion Florian Mussner, Sabina Kasslatter Mur y Hans Berger, vën bele metuda a jì per l cuarto iede. L se trata de na culaburazion dla repartizion per la sustëni ala furmazion, i trëi departimënc ala furmazion, i ufizies per la furmazion d'agricultura y la lia provinziela di artejans.
Tl cheder dal fiera uniral nce tenì l campionat provinziel di lerneri. Tlo fajerà pea 160 lerneri de 30 mestieres.
La fiera Futurum tla fiera a Bulsan, sarà davierta dai 4 ai 6 de utober, dala 9 da duman nchin la 6 da sëira. Nfurmazion de utl ie nce da abiné sun la plata web www.futurum.it/rm.
La fiera unirà giaurida ufizialmënter n juebia ai 4 de utober dala 11.00 danmesdì dal presidënt dla Provinzia Luis Durnwalder deberieda cun i assessëures ala furmazion Mussner, Kasslatter Mur, Tommasini y Berger.
as
