Atualità
Edith Ploner presidënta ladina tl Cunsëi scolastich provinziel
USP - L Cunsëi scolastich provinziel à lità si presidënza nueva per i proscimi cater ani. La ncëria da presidënt vën curida a rotazion danter la grupes de rujeneda y ntan l ultimo ann menerà Edith Ploner chësc majer organn cunsultiv dla scoles tla Provinzia de Bulsan. (NSNUET) Ai 17 de setëmber iel nce unì lità Christoph Hartung von Hartungen per la grupa tudëscia y Carlo Runcio per la grupa taliana.
L Cunsëi scolastich provinziel à cun si 63 cumëmbri na funzion consultiva per la gran dezijions che reverda la scoles. For inò iel de bujën de se adaté ai tëmps y nsci vën chësc cunsëi cherdà a de ju na minonga da espert sun programs de scola, materies o nce sce la se trata de mëter su y tò ju scoles.
Tl plenum vëniel tratà i gran argumënc che reverda duta trëi grupes de rujeneda. Ntan i prim trëi ani sarà n iede Christoph Hartung von Hartungen presidënt y pona Carlo Runcio. Ntan l cuarto ann sarà l'ispetëura dla scolines ladines Edith Ploner presidënta dl Cunsëi scolastich provinziel. "Te chësc majer organn lità saral de bujën de na vijion deberieda per purté inuvazion tla scola, se adatan ala cundizions che l tëmp ne mët dant" à dit la presidënta ladina riesc do si vela. L sistem de presidënt a rotazion danter la trëi grupes de rujeneda vëija dant che i autri doi cuer daniëura la ncëria da vizepresidënt. L tëmp de presidënza ie mpartì te 18 mënsc per la grupa tudëscia, 18 mënsc per la grupa talian y 12 mënsc per la grupa ladina.
La Scola ladina à de ndut 8 cumëmbri te chësc cunsëi (cun 12,7% de 63 cumëmbri iel na reprejentanza sëura l pruporz). L assessëur ladin Florian Mussner y l ntendënt Roland Verra ie cumëmbri de dërt. A reprejenté i diretëures y ispetëures fova bele de mei unida liteda Edith Ploner. I trëi reprejentanc di nsenianc ladins fova unic litei Walter Pescosta (scoles autes), Michaela Vittur (scoles elementeres) y Uberto Valentini (scoles mesanes). I genitores dla scoles ladines ie reprejentei da Ivana Peristi y i sculeies da Romeo Costa.
Per cuestions che reverda me una grupa de rujeneda vëniel nce laurà te sezions. Edith Ploner menerà la sezion ladina per dut l tëmp nchin ala fin dl ann de scola 2015/16. Tla sezion ladina dl Cunsëi scolastich iel mo 8 reprejentanc sëuraprò, che ne fej nia pert dl plenum. Tlo fovel d'ansciuda unì lità Bruno Senoner (diretëur), Rosmarie Senoner (scolines), Verena Niederegger (nsenianc de religion), Andreas Tomasini (scola prufesciunela), Heinrich Videsott (Chemuns), Evelin Moroder (economia y mond dl lëur), Paul Videsott (Università) y Andrea Tardivo (cësa per i studënc).
as
Galaria dales fotografies
