Atualità
Ok da Roma per l calënder de scola y furmazion di maestri
USP – L Guviern a Roma à azetà la lege provinziela dl’ena a cin dis per la scoles dl Südtirol y l minister al’istruzion Profumo à dat pro l decret per tenì i cursc de abilitazion per maestri tl’Università a Persenon. L assessëura Kasslatter Mur che à giapà la nutizies da Roma, valuteia chëstes sciche gran suzes.
Ala lege provinziela 13 dl 13 de lugio 2012 sun l calënder de scola y la unificazion dl'ena de scola a 5 dis per dut l Südtirol, ne ti vëniel da pert dl Guviern talian a Roma nia fat recurs dan la Suneria costituzionela. Per l'assessëura Sabina Kasslatter Mur vëij te chësta dezijion na tëuta de posizion per la Jonta provinziela. "La dezijion dl Guviern a Roma demostra che l cheder urganisatif per la scoles possa unì adatà dala Provinzia ai bujëns dla cumenanza mantenian l'autonomia pedagogica" dij l'assessëura ala scoles.
La segonda nutizia da Roma reverda l decret dl minister Francesco Profumo per pité i cursc de abilitazion per maestri. Chësta ie la basa per ntegré academics tla stieres de urganich. Chësta problematica se tira bele inant da truep tëmp, ntant iel feter 600 suplënc che aspieta de giapé na stiera segura, de rodul. Nsenianc che à studià tl'Austria o tl Deutschland pudova nchinamo unì ntegrei tl urganich, ma chëi che à studià tl Südtirol nia, ajache l Minister ne à nia pità i cursc aldò. La Provinzia à marciadà cun l Minister a Roma per i cursc de abilitazion (TFA, „Tirocinio formativo attivo") che à śën giapà l bënsté tres decret. Per la grupa de rujeneda ladina iel ti cursc de abilitazion udù dant 12 lueges (cëla lista junteda pro).
Nfurmazion di cursc de abilitazion vën l'ena che vën publichei sun la plata web dl'Università (http://www.unibz.it/).
as
